बाढीको भेलले क्षणभरमै नदी किनारका घर, व्यवसाय तथा विभिन्न संरचना बगाउनुका साथै लेदो र गेग्रानले पुरेको छ। नदी किनारका कतिपय वस्ती पूर्ण रूपमा ध्वस्त भएका छन्।

नेपालखबरको टोलीले हेलिकप्टरमार्फत त्रिशूली र भोटेकोशी नदीको किनारैकिनार नेपाल–चीन सीमासम्म पुगेर बाढीले पुर्‍याएको क्षतिको अवलोकन गरेको छ। हेलिकप्टरबाट गरिएको अवलोकनका क्रममा नदी किनारका वस्तीहरू ठूलो मात्रामा क्षतिग्रस्त देखिएका छन्। कुनै समय घर तथा संरचना रहेको स्थानमा अहिले लेदो र गेग्रानको थुप्रो मात्र देखिन्छ।

बाढीले बजार क्षेत्रसमेत पुरिएपछि ठूलो क्षेत्र लेदोले ढाकिएको छ। नदी किनारका कतिपय वस्तीको अस्तित्व नै मेटिएको देखिन्छ। मानिसहरूको चहलपहल हुने क्षेत्र अहिले सुनसान बनेका छन्।

पुल, भन्सार र जलविद्युत् आयोजनामा क्षति

हेलिकप्टरबाट गरिएको अवलोकनका क्रममा बाढीले पुल, भन्सार कार्यालय तथा विभिन्न जलविद्युत् आयोजनाका संरचनामा समेत क्षति पुर्‍याएको देखिएको छ।

बाढीले स्थानीय पूर्वाधारमा क्षति पुर्‍याएपछि स्थानीयवासीको जनजीवन अस्तव्यस्त बनेको छ। नदी किनारका सडक तथा अन्य संरचनामा समेत क्षति पुगेकाले आवतजावत र उद्धारमा समस्या देखिएको छ।

अझै उच्च बहावमा भोटेकोशी

भोटेकोशी नदीमा अझै पानीको बहाव उच्च रहेको छ। पानीको सतह अपेक्षित रूपमा घट्न नसक्दा नदी आसपासका क्षेत्र जोखिममा छन्।

उच्च बहावका कारण उद्धार तथा राहत कार्यसमेत प्रभावित भएको छ। नदी किनारमा रहेका बाँकी संरचना र बस्तीहरूमा समेत थप क्षतिको जोखिम रहेकाले स्थानीयलाई सतर्क रहन आग्रह गरिएको छ।