काठमाडौं । गत आर्थिक वर्ष २०८२/८३ मा नेपालको शोधनान्तर स्थिति १० खर्ब २७ अर्ब ४ करोड रुपैयाँले बचतमा रहेको नेपाल राष्ट्र बैंकले जनाएको छ। अघिल्लो आर्थिक वर्षमा यो बचत ५ खर्ब ९४ अर्ब ५४ करोड रुपैयाँ थियो ।

राष्ट्र बैंकका अनुसार, समीक्षा अवधिमा रेमिट्यान्स आप्रवाहमा आएको उल्लेख्य वृद्धिले शोधनान्तर बचत बढाउन महत्वपूर्ण योगदान गरेको हो। गत आवमा रेमिट्यान्स ३७.१ प्रतिशतले बढेर २३ खर्ब २६ अर्ब रुपैयाँ पुगेको छ ।

वस्तु निर्यात पनि यस अवधिमा १३.८ प्रतिशतले बढेर ३ खर्ब १५ अर्ब २९ करोड रुपैयाँ पुगेको छ। तर, कुल वस्तु आयात १६.२ प्रतिशतले बढेर २० खर्ब ९६ अर्ब ३८ करोड रुपैयाँ पुगेको छ। आयातमा वृद्धि भए पनि रेमिट्यान्स आप्रवाहमा भएको सुधारले बाह्य क्षेत्रको बचत थप बलियो बनाएको राष्ट्र बैंकले बताएको छ ।

अमेरिकी डलरमा शोधनान्तर

अमेरिकी डलरमा हिसाब गर्दा, अघिल्लो आर्थिक वर्षमा शोधनान्तर ४ अर्ब ३७ करोड डलरले बचतमा रहेको थियो। तर समीक्षा वर्षमा यो बचत ७ अर्ब ५ करोड डलर पुगेको छ।

यस्तै, गत आवमा चालु खाता ९ खर्ब २३ अर्ब ५६ करोड रुपैयाँले बचतमा रह्यो। अघिल्लो वर्षमा चालु खाता ४ खर्ब ९ अर्ब ८४ करोड रुपैयाँले बचतमा थियो। समीक्षा अवधिमा खुद पुँजीगत ट्रान्सफर १८ अर्ब ५० करोड रुपैयाँ पुगेको छ, जुन अघिल्लो वर्षमा ९ अर्ब ८४ करोड रुपैयाँ थियो ।

वैदेशिक लगानी

त्यस्तै, गत आर्थिक वर्षमा नेपालमा २८ अर्ब ४९ करोड रुपैयाँ प्रत्यक्ष वैदेशिक लगानी भित्रिएको छ। यो तथ्यांक केवल इक्विटी लगानीको हो। अघिल्लो आवमा यस्तो प्रत्यक्ष वैदेशिक लगानी १२ अर्ब २ करोड रुपैयाँ थियो। देशमा भित्रिने र बाहिरिने रकमबीचको अन्तरलाई नै शोधनान्तर स्थिति भनिन्छ, जहाँ भित्रिने रकम बाहिरिनेभन्दा बढी हुँदा शोधनान्तर बचतमा रहने गर्छ ।

Originally published on abcnews.com.np.