काठमाडौं । रसुवामा आएको विनाशकारी बाढीमा परी गोसाइँकुण्ड गाउँपालिकाकी उपाध्यक्ष प्रतिमा तामाङ बेपत्ता भएकी छन्। स्थानीय स्रोतका अनुसार बाढीले स्याफ्रुबेंसी क्षेत्रलाई प्रभावित बनाउँदा उहाँ सम्पर्कविहीन हुनुभएको हो।

उहाँसँगै गोसाइँकुण्ड गाउँपालिका–५ का वडाध्यक्ष दावा मिङमर तामाङ पनि सम्पर्कविहीन रहेको जनाइएको छ। दुवैजनाको खोजी तथा उद्धारका लागि प्रयास जारी रहेको छ।

एमाले नेता प्रेम तामाङका अनुसार रसुवागढी, टिमुरे, स्याफ्रुबेंसी र मैलुङ क्षेत्रमा बाढीले ठूलो जनधनको क्षति पुर्‍याएको छ। खोला किनारका बस्ती, सडक, पुल तथा अन्य भौतिक संरचनामा व्यापक क्षति पुगेपछि प्रभावित क्षेत्रसँगको सम्पर्कसमेत कठिन बनेको छ।

उनले माथिल्लो क्षेत्रबाट आएका बिरामी तथा घाइतेलाई एम्बुलेन्समार्फत सुरक्षित स्थानमा लैजानसमेत कठिन भएको बताएका छन्। बाढीले पुलहरू बगाएपछि धेरै स्थान सडक सम्पर्कबाट विच्छेद भएका छन्।

उद्धारमा हेलिकप्टरको अभाव

प्रभावित क्षेत्रमा घाइतेहरूको उद्धारका लागि हेलिकप्टरको पर्याप्त व्यवस्था नभएको स्थानीयले बताएका छन्। बेत्रावतीलगायत क्षेत्रमा घाइतेलाई अस्थायी रूपमा जम्मा गरिए पनि गम्भीर अवस्थाका बिरामीलाई तत्काल काठमाडौं पुर्‍याउन कठिनाइ भइरहेको बताइएको छ।

“एउटा-दुईवटा हेलिकप्टरले उद्धार गरिरहेका छन्, तर त्यो पर्याप्त छैन,” नेता तामाङले बताएका छन्।

उनका अनुसार टिमुरे, मैलुङ र स्याफ्रुबेंसीलगायत क्षेत्रमा उद्धार कार्य अत्यन्तै चुनौतीपूर्ण बनेको छ। लगातार वर्षा, भासिएको जमिन, चिप्लो जंगल तथा बाढीले बगाएका सडक र पुलका कारण उद्धार टोलीलाई प्रभावित क्षेत्रमा पुग्न कठिनाइ भइरहेको छ।

स्थानीय तथा सुरक्षा निकायले बेपत्ता गाउँपालिका उपाध्यक्ष प्रतिमा तामाङ, वडाध्यक्ष दावा मिङमर तामाङ तथा अन्य सम्पर्कविहीन नागरिकको खोजी कार्य जारी राखेका छन्।

Originally published on abcnews.com.np.