तनहुँ । रसुवा जिल्लाको भोटेकोशी क्षेत्रमा आएको विनाशकारी बाढीले बगाएर लगेका ६ जनाको शव तनहुँमा फेला परेको छ।

जिल्ला प्रहरी कार्यालय तनहुँका प्रवक्ता प्रहरी नायब उपरीक्षक द्वारिकाप्रसाद घिमिरेका अनुसार आबुखैरेनी क्षेत्रमा दुई वटा र देवघाट क्षेत्रमा चार वटा शव फेला परेका हुन्।

फेला परेका शवहरूको हालसम्म सनाखत हुन सकेको छैन। प्रहरीले शवहरूलाई आवश्यक प्रक्रिया तथा पहिचानका लागि जिल्ला अस्पतालमा राखेको जनाएको छ।

शव फेला परेपछि खोजी तथा उद्धारका लागि इलाका प्रहरी कार्यालय आबुखैरेनीका प्रहरी निरीक्षक प्रदीप सुवेदीको नेतृत्वमा प्रहरी टोली परिचालन गरिएको थियो।

यसैबीच, तनहुँको मुग्लिन र देवघाट आसपासका क्षेत्रमा विपद्को जोखिमलाई ध्यानमा राख्दै प्रहरीले सुरक्षा सतर्कता बढाएको जनाएको छ। जिल्ला प्रहरी प्रवक्ता घिमिरेका अनुसार सम्भावित विपद्जन्य जोखिमबाट जोगिन सर्वसाधारणलाई आवश्यक सावधानी अपनाउन आग्रह गरिएको छ।

प्रहरी टोली प्रभावित नदी किनार तथा जोखिमयुक्त क्षेत्रमा सक्रिय रहेको र थप शव वा बाढीबाट बगेका व्यक्तिको खोजी कार्य जारी रहेको जनाएको छ।

Originally published on abcnews.com.np.