काठमाडौं । रसुवाको भोटेकोसी नदीमा आएको बाढीपछि अहिले भोटेकोसी र त्रिशूली नदीको बहाव सतर्कता तहभन्दा तल झरेको छ। यद्यपि, नदी आसपासका क्षेत्रमा उच्च सतर्कता अपनाउन बाढी पूर्वानुमान महाशाखाले आग्रह गरेको छ।

महाशाखाले बिहीबार बिहान ८ बजे जारी गरेको सूचनाअनुसार कोसी, नारायणी, बागमती, कर्णाली र महाकाली नदी तथा तिनका सहायक नदीहरूको बहाव पनि हाल सतर्कता तहभन्दा तल रहेको छ।

यस्तै, कन्काई, कमला, बबई, पूर्वी राप्ती तथा पश्चिम राप्ती नदीको बहावसमेत सतर्कता तहभन्दा मुनि रहेको महाशाखाले जनाएको छ।

बुधबार रसुवाको भोटेकोसीमा आएको विनाशकारी बाढीपछि महाशाखाले प्रमुख नदी तथा सहायक नदीहरूको बहाव निरन्तर निगरानी गरिरहेको जनाएको छ।

वर्षा भए बहाव बढ्न सक्ने

बिहान गरिएको मापनअनुसार प्रमुख नदीहरूमा पानीको सतह हाल सामान्य अवस्थामा रहेको र तत्काल ठूलो बाढीको जोखिम नदेखिएको महाशाखाले जनाएको छ।

तर वर्षा जारी रहेमा वा मौसममा अचानक परिवर्तन आएमा नदीको बहाव पुनः बढेर सतर्कता तह नाघ्न सक्ने भएकाले नदी किनार तथा तटीय क्षेत्रमा उच्च सतर्कता अपनाउन आग्रह गरिएको छ।

महाशाखाले नदीको बहावसम्बन्धी आधिकारिक सूचना तथा पूर्वानुमानलाई आधार मानेर आवश्यक सावधानी अपनाउनसमेत सर्वसाधारणलाई अनुरोध गरेको छ।

Originally published on abcnews.com.np.