पोखरा । नेपाल प्रहरीले विपद्को संवेदनशील अवस्थामा सहयोगका नाममा सरकारी लोगो, नाम तथा पहिचानको दुरुपयोग गरी ठगी हुन सक्ने भन्दै सर्वसाधारणलाई सचेत गराएको छ।

रसुवाको भोटेकोशीमा आएको भीषण बाढीपछि ‘प्रधानमन्त्री दैवी प्रकोप उद्धार कोष’ वा ‘प्रधानमन्त्री राहत कोष’को नाम प्रयोग गरी व्यक्तिगत बैंक खाता वा ई–वालेटमा रकम पठाउन लगाउने प्रयास हुन सक्ने भन्दै प्रहरीले सावधानी अपनाउन आग्रह गरेको हो।

प्रहरीका अनुसार दुषित मनसाय भएका व्यक्तिले आधिकारिक निकायको लोगो, नाम तथा ढाँचा नक्कल गरी फर्जी क्यूआर कोड बनाएर रकम संकलन गर्न सक्छन्।

त्यस्तै, फेसबुक, ह्वाट्सएप, टिकटक, इन्स्टाग्राम, भाइबरलगायत सामाजिक सञ्जालमा फरक–फरक ‘राहत कोष’ वा ‘सहयोग अभियान’का नाममा फर्जी पेज तथा समूह सञ्चालन हुन सक्ने प्रहरीले जनाएको छ।

‘राहत सहयोग दर्ता’का नाममा फोन गरेर व्यक्तिगत तथा बैंकिङ विवरण माग्ने, फिसिङ लिंक पठाएर ओटीपी तथा पासवर्ड चोरी गर्ने तथा ‘म सुरक्षित छु, मलाई पैसा पठाइदिनू’ भन्दै अपरिचित नम्बरबाट आर्थिक सहयोग माग्ने गतिविधिप्रति समेत सचेत रहन प्रहरीले आग्रह गरेको छ।

आधिकारिक माध्यमबाट मात्र पुष्टि गर्न आग्रह

प्रहरीले राहत तथा सहयोगका नाममा कुनै रकम पठाउनुअघि प्रधानमन्त्री तथा मन्त्रिपरिषद्को कार्यालयको आधिकारिक वेबसाइट वा प्रमाणित सामाजिक सञ्जालका माध्यमबाट मात्र विवरण पुष्टि गर्न आग्रह गरेको छ।

सरकारी राहत कोष वा अभियानको नाममा प्राप्त हुने शंकास्पद क्यूआर कोड, लिंक, फोन वा सन्देशमा विश्वास नगर्न तथा व्यक्तिगत, बैंकिङ र गोप्य विवरण कसैलाई उपलब्ध नगराउन प्रहरीले अनुरोध गरेको छ।

Originally published on abcnews.com.np.