काठमाडौं । रसुवाको भोटेकोसी बाढीमा परी घाइते भएका ८६ जनाको विभिन्न अस्पतालमा उपचार भइरहेको छ। स्वास्थ्य तथा जनसंख्या मन्त्रालयका अनुसार उपचारपछि ४८ जना डिस्चार्ज भएका छन्।

मन्त्रालयका अनुसार रसुवा जिल्ला अस्पताल धुन्चेमा उपचारका लागि ल्याइएका ५३ घाइतेमध्ये एक जनाको मृत्यु भएको छ। ११ जना उपचाररत छन् भने १३ जनालाई थप उपचारका लागि अन्य अस्पतालमा रिफर गरिएको छ। २८ जना उपचारपछि डिस्चार्ज भएका छन्।

यस्तै, त्रिशूली अस्पताल नुवाकोटमा भर्ना भएका १७ घाइतेमध्ये चार जना उपचाररत छन् भने १३ जना डिस्चार्ज भएका छन्।

आयुर्वेदिक अस्पताल नुवाकोटमा १० जना, वीरेन्द्र अस्पताल छाउनीमा एक जना, मनमोहन अस्पतालमा एक जना, वीर अस्पतालमा तीन जना र नर्भिक अस्पतालमा तीन जना उपचाररत रहेको मन्त्रालयले जनाएको छ।

त्रिभुवन शिक्षण अस्पतालमा ल्याइएका ३७ घाइतेमध्ये ३१ जना उपचाररत छन्। पाँच जना डिस्चार्ज भएका छन् भने एक जनाको मृत्यु भएको छ।

त्यस्तै, ट्रमा सेन्टरमा उपचारका लागि ल्याइएका १० जनामध्ये आठ जना उपचाररत छन्। एक जनालाई थप उपचारका लागि रिफर गरिएको छ भने एक जना डिस्चार्ज भएका छन्।

Originally published on abcnews.com.np.