काठमाडौँ । सिभिल सहकारीका सञ्चालक इच्छाराज तामाङसहित १७ जना सहकारी ठगी मुद्दामा दोषी ठहर भएका छन्। जिल्ला अदालत, काठमाडौँले उनीहरूलाई ठगीसम्बन्धी कसुरमा दोषी ठहर गरेको हो।

न्यायाधीश कृतबहादुर बोहराको इजलासले तामाङसहित १७ जनालाई मुलुकी ऐन ठगीको महल १ तथा मुलुकी अपराध संहिता, २०७४ को दफा २४९ को उपदफा (१) बमोजिम दोषी ठहर गरेको हो।

दोषी ठहर हुनेमा तामाङसहित दुर्गाबहादुर संग्रौला, जयन्द्रलाल श्रेष्ठ, खेमनाथ डल्लाकोटी, प्रविणप्रसाद प्रधान, केशवलाल श्रेष्ठ, रामकृष्ण पौडेल, सुमन नन्दन वैद्य, हरिहरप्रसाद लामिछाने, मुकुन्दप्रसाद नेउपाने, दानहिरा तुलाधर, नगेन्द्र बिमली, रामराज मास्के, हरिप्रसाद रिसाल, सिर्जना शाक्य तामाङ, लालकाजी गुरुङ र मिना गुरुङ छन्।

अदालतले सजाय निर्धारणका लागि भदौ २५ गते पेसी तोकेको छ। दुवै पक्षको प्रतिवेदन लिएर त्यसपछि उनीहरूलाई हुने सजाय निर्धारण गरिने अदालतको आदेशमा उल्लेख छ।

संगठित अपराधमा सफाइ

अदालतले तामाङसहित सबै प्रतिवादीलाई संगठित अपराधसम्बन्धी कसुरमा भने सफाइ दिएको छ।

यसअघि उनीहरूमाथि सहकारीमा बचतकर्ताले जम्मा गरेको रकम ठगी तथा अपचलन गरेको आरोपमा मुद्दा दायर भएको थियो। अब भदौ २५ गते हुने सुनुवाइपछि दोषी ठहर भएकाहरूको सजाय टुंगो लाग्नेछ।

Originally published on abcnews.com.np.