काठमाडौं । रसुवा जिल्लाको भोटेकोसीमा आएको विनाशकारी बाढीपछि अप्पर त्रिशूली जलविद्युत् आयोजनाको टनेलभित्र फसेका ३५० जना मजदुर तथा स्थानीयको नेपाली सेनाले उद्धार गरेको छ।

प्रतिकूल मौसम र बाढीको तीव्र बहावका बीच नेपाली सेनाले जोखिमपूर्ण उद्धार अभियान सञ्चालन गरी उनीहरूलाई सुरक्षित स्थानमा पुर्‍याएको जनाएको छ। यद्यपि, टनेलभित्र अझै १०० जनाभन्दा बढी व्यक्ति फसेका छन्। उनीहरूलाई सुरक्षित रूपमा बाहिर निकाल्न उद्धार अभियान निरन्तर जारी रहेको नेपाली सेनाले जनाएको छ।

टनेलभित्रको जटिल तथा जोखिमपूर्ण उद्धार अभियानका लागि नम्बर १ सेकेन्ड मुभमेन्ट ट्याक्टिकल हेडक्वार्टर, त्रिशूलीबाट जमदार भक्तजन बस्नेतको कमान्डमा १/३ को सैन्य टोली परिचालन गरिएको छ। उक्त टोली उद्धार कार्यमा अहोरात्र खटिएको जनाइएको छ।

विभिन्न स्थानबाट थप ५३३ जनाको उद्धार

बाढीको उच्च जोखिममा परेका रसुवाका अन्य विकट क्षेत्रमा पनि नेपाली सेनाले उद्धार अभियानलाई निरन्तरता दिएको छ। सेनाका अनुसार स्याफ्रुबेँसी, टिमुरे, मैलुङ, ठूलो हाकु र हाकुबेँसीका विभिन्न स्थानबाट थप ५३३ जनाको उद्धार गरिएको छ।

यससँगै नेपाली सेनाले बिहीबार, भदौ ११ गते मात्रै रसुवाका विभिन्न बाढी प्रभावित क्षेत्रबाट कुल ८८३ जना स्थानीय तथा मजदुरलाई सुरक्षित स्थानमा पुर्‍याएको जनाएको छ।

टनेलमा फसेकाको उद्धार जारी

भोटेकोसीमा आएको विनाशकारी बाढीपछि अप्पर त्रिशूली जलविद्युत् आयोजनाको टनेलभित्र ठूलो संख्यामा मानिस फसेको जानकारी आएपछि नेपाली सेना तत्काल उद्धार अभियानमा परिचालित भएको थियो।

हालसम्म ३५० जनालाई उद्धार गरी सुरक्षित स्थानमा पुर्‍याइए पनि टनेलभित्र रहेका १०० जनाभन्दा बढी व्यक्तिको उद्धार कार्य जारी छ। प्रतिकूल मौसम, बाढीको तीव्र बहाव र टनेलभित्रको जटिल अवस्थाका कारण उद्धार अभियान चुनौतीपूर्ण बनेको बताइएको छ।

नेपाली सेनाले प्रभावित क्षेत्रमा फसेका सबै व्यक्तिको सुरक्षित उद्धारलाई प्राथमिकता दिँदै आवश्यक जनशक्ति र स्रोतसाधन परिचालन गरेको जनाएको छ।

Originally published on abcnews.com.np.