काठमाडौं । चीनको तिब्बत क्षेत्रमा हिमताल फुटेर रसुवाको भोटेकोसी नदीमा भीषण बाढी आउन सक्ने सूचनापछि वस्तुस्थिति बुझ्न जनप्रतिनिधि तथा प्रशासनको टोली सीमा क्षेत्र पुगेको छ।

गोसाइँकुण्ड गाउँपालिकाका अध्यक्ष कैसाङ नुर्पु तामाङ र रसुवाका सहायक प्रमुख जिल्ला अधिकारी ध्रुवप्रसाद अधिकारी सम्मिलित टोलीले हेलिकोप्टरमार्फत रसुवागढी नाका तथा आसपासका क्षेत्रको हवाई निरीक्षण गरेको हो।

अवलोकनपछि गाउँपालिका अध्यक्ष तामाङले भोटेकोसी नदीमा हाल ठूलो वा असामान्य तथा जोखिमपूर्ण बाढीको अवस्था नदेखिएको जानकारी दिएका छन्। हवाई निरीक्षणका क्रममा नदीको बहाव सामान्य अवस्थामै रहेको पाइएको उनले बताए।

‘नदीको बहाव सामान्य अवस्थामै रहेको छ। आत्तिनुपर्ने स्थिति छैन, तर सचेत र चनाखो चाहिँ हुनुपर्छ,’ अध्यक्ष तामाङले भने।

तिब्बत क्षेत्रमा हिमताल फुटेको सूचना आएपछि सम्भावित जोखिमलाई ध्यानमा राख्दै स्थानीय प्रशासन र जनप्रतिनिधिको टोलीले सीमा क्षेत्रको स्थलगत अवस्थाबारे जानकारी लिन हवाई निरीक्षण गरेको थियो।

हाल नदीको बहाव सामान्य देखिए पनि तटीय क्षेत्रका नागरिकलाई निरन्तर सतर्क रहन आग्रह गरिएको छ। सम्भावित जोखिमबाट जोगिन स्थानीय प्रशासन र स्थानीय तहले नदी तथा आसपासको अवस्थामाथि निरन्तर निगरानी राखिरहेको जनाएको छ।

पूर्वतयारी र उच्च सतर्कताले सम्भावित जोखिम न्यूनीकरण गर्न सहयोग पुग्ने भएकाले नदी किनार तथा जोखिमयुक्त क्षेत्रमा रहेका नागरिकलाई आधिकारिक निकायबाट जारी हुने सूचना र निर्देशन पालना गर्न पनि आग्रह गरिएको छ।

Originally published on abcnews.com.np.