जनकपुरधाम । मधेश प्रदेश सरकारले अर्थ मन्त्रालयअन्तर्गत प्रशासन सेवा, लेखा समूहका ७६ जना कर्मचारीको एकैपटक सरुवा गरेको छ।

सरुवा हुनेमा २३ जना अधिकृत, ४३ जना लेखापाल र १० जना सहलेखापाल रहेका छन्। अधिकृततर्फ १८ जना सातौँ तह र पाँच जना आठौँ तहका कर्मचारी रहेका छन्।

मधेश प्रदेशका अर्थमन्त्री युवराज भट्टराईले लामो समयदेखि एउटै कार्यालयमा बसेर प्रभाव जमाउँदै आएका कर्मचारीलाई स्थानान्तरण गर्ने उद्देश्यले सरुवा गरिएको बताएका छन्।

उनका अनुसार एउटै स्थानमा लामो समयसम्म कार्यरत रहँदा कर्मचारीको प्रभाव बढ्ने र त्यसले कार्यालयको कामकारबाहीमा समेत असर पर्न सक्ने अवस्था देखिएपछि व्यापक सरुवा गरिएको हो।

‘लामो समयदेखि आफ्नो प्रभाव जमाएर एउटै स्थानमा बसिरहने र कार्यालयलाई कब्जा जस्तो बनाएर राख्ने अवस्था देखिएपछि सरुवा गरिएको हो,’ मन्त्री भट्टराईले भने।

सरुवा सूचीअनुसार अधिकृत तहका कर्मचारीलाई मुख्यमन्त्री तथा मन्त्रिपरिषद्को कार्यालय, प्रदेश लेखा नियन्त्रक कार्यालय, विभिन्न मन्त्रालय, निर्देशनालय तथा जिल्लास्थित कार्यालयमा खटाइएको छ।

त्यस्तै, ४३ जना लेखापाललाई मधेश प्रदेशका विभिन्न मन्त्रालय, निर्देशनालय, प्रदेश लेखा इकाई कार्यालय तथा मातहतका अन्य कार्यालयमा सरुवा गरिएको छ।

धनुषा, महोत्तरी, सिरहा, सर्लाही, रौतहट, बारा र पर्सालगायत जिल्लाका विभिन्न कार्यालयमा कार्यरत लेखापालहरूलाई एक कार्यालयबाट अर्को कार्यालयमा पठाइएको छ।

यसैगरी, १० जना सहलेखापालको पनि सरुवा गरिएको छ। उनीहरूलाई धनुषा, सिरहा, महोत्तरी, बारा र पर्सालगायत जिल्लाका विभिन्न कार्यालयमा खटाइएको छ।

अर्थ मन्त्रालयको यस निर्णयसँगै मधेश प्रदेशमा लामो समयदेखि एउटै कार्यालयमा कार्यरत लेखा समूहका कर्मचारीहरूको व्यापक हेरफेर भएको छ।

Originally published on abcnews.com.np.