काठमाडौं । रसुवाको भोटेकोशी नदीमा फेरि लेदोसहित पानीको बहाव बढेको जानकारी प्राप्त भएपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले उच्च सतर्कता अपनाउन आग्रह गरेको छ ।

प्राधिकरणका प्रवक्ता शान्ति महतले सूचना जारी गर्दै भोटेकोशी तथा त्रिशूली नदी किनारमा उद्धार र राहत कार्यमा खटिएका सुरक्षाकर्मी, उद्धारकर्ता तथा अन्य व्यक्तिलाई विशेष सावधानी अपनाउन आग्रह गर्नुभएको हो ।

थप बाढी आउन सक्ने जोखिम रहेकाले नदी किनार तथा जोखिमयुक्त क्षेत्रमा रहेका नागरिकलाई सुरक्षित स्थानमा जान प्राधिकरणले अनुरोध गरेको छ ।

सूचनामा भनिएको छ, ‘भोटेकोशी एवं त्रिशूली नदी किनारमा उद्धार एवं राहत कार्यमा खटिनुभएका र अन्य विविध कारणले जोखिम क्षेत्रमा रहनु भएका सबैलाई उच्च सतर्कता अपनाउन र जोखिम देखिनासाथ तुरुन्त सुरक्षित स्थानमा जान विशेष अनुरोध गरिन्छ।’

चीनतर्फ थुनिएको पानीको संरचना पुनः फुटेको सूचना प्राप्त भएपछि नदी आसपासको क्षेत्रमा जोखिम बढेको प्राधिकरणले जनाएको छ । सोही कारण उद्धार तथा राहत कार्यमा खटिएका टोलीलाई समेत थप सतर्कता अपनाउन भनिएको हो ।

यसैबीच प्रहरीले पनि चीनतर्फको संरचना फुटेको सूचना आएपछि भोटेकोशी तथा त्रिशूली नदीको तल्लो तटीय क्षेत्रमा रहेका नागरिकलाई सुरक्षित स्थानमा बस्न आग्रह गरेको छ ।

Originally published on abcnews.com.np.