काठमाडौं। अध्यागमन विभागले रसुवागढी नाकाबाट तिब्बतको कैलाश मानसरोवर गएका तीर्थयात्रीलाई हुम्लास्थित हिल्सा नाकाबाट नेपाल फर्कन अनुरोध गरेको छ ।

भदौ १० गते रसुवाको टिमुरे हुँदै बग्ने भोटेकोशी नदीमा आएको बाढीले चीन प्रवेश गर्ने सडक, पुललगायतका भौतिक संरचनामा व्यापक क्षति पुर्‍याएपछि विभागले यस्तो अनुरोध गरेको हो ।

शुक्रबार सूचना जारी गर्दै विभागले रसुवाको बाटो भएर फर्कन सक्ने अवस्था नरहेकाले कैलाश मानसरोवरबाट फर्किने विदेशी नागरिकलाई हिल्सा नाका प्रयोग गर्न आग्रह गरेको जनाएको छ ।

विभागका अनुसार भदौ ११ गतेदेखि लागू हुने गरी एक सातासम्म रसुवास्थित अध्यागमन कार्यालयबाट प्रस्थान अनुमति लिएर कैलाश मानसरोवर तीर्थयात्रामा गएका विदेशी नागरिक हिल्सा नाकाबाट नेपाल प्रवेश गर्दा निषेधित क्षेत्रको पदयात्रा दस्तुर तिर्नुपर्ने छैन ।

यस्तै, हिल्सा नाकाबाट फर्किने तीर्थयात्रीका लागि विदेशी नागरिक र ट्रेकिङ गाइडको बिमा तथा ट्रेकिङ गाइडसम्बन्धी व्यवस्था पनि अनिवार्य नगरिएको विभागले जनाएको छ ।

प्रचलित अध्यागमन कानुनअनुसार निषेधित क्षेत्रमा पदयात्रा गर्दा अध्यागमन विभागबाट अनिवार्य रूपमा पदयात्रा अनुमति लिनुपर्ने व्यवस्था छ । हुम्लाको हिल्सा नाकाबाट नेपाल प्रवेश गर्दा विदेशी नागरिकले निषेधित क्षेत्र प्रयोग गर्नुपर्ने भएकाले तोकिएको पदयात्रा दस्तुर तिर्नुपर्ने व्यवस्था अध्यागमन नियमावली, २०५१ को अनुसूची १२ मा छ ।

तर, हालको विषम परिस्थितिलाई मध्यनजर गर्दै मानवीय सुरक्षालाई पहिलो प्राथमिकतामा राखेर कैलाश मानसरोवर तीर्थयात्रीको सहज आवतजावत सुनिश्चित गर्न एक साताका लागि उक्त दस्तुर मिनाहा गरिएको विभागले जनाएको छ ।

हाल कैलाश मानसरोवर तीर्थयात्राको उपयुक्त समय रहेकाले भारतलगायत विभिन्न मुलुकका ठूलो संख्याका नागरिक रसुवाको टिमुरेस्थित अध्यागमन कार्यालयबाट प्रस्थान अनुमति लिएर रसुवागढी नाकाबाट चीन प्रवेश गरेका छन् ।

रसुवा नाका तत्काल सञ्चालनमा आउन नसक्ने अवस्था रहेकाले तीर्थयात्रीका लागि हिल्सा र सिन्धुपाल्चोकको तातोपानी नाका नेपाल फर्किने वैकल्पिक मार्ग बनेका छन् ।

Originally published on abcnews.com.np.