बागलुङ । जनैपूर्णिमाको अवसरमा बागलुङको ढोरपाटन नगरपालिका–९ स्थित प्रसिद्ध उत्तरगंगा ढोरबराह मन्दिरमा दर्शनार्थी तथा श्रद्धालुको ठूलो भीड लागेको छ। सडक पहुँच विस्तार भएसँगै जनैपूर्णिमाका अवसरमा ढोरपाटन उपत्यकामा पुग्ने भक्तजनको संख्या वर्षेनि बढ्दै गएको छ।

ढोरबराहको विशेष पूजा गर्न जनैपूर्णिमाको अघिल्लो दिनदेखि नै भक्तजनहरू ढोरपाटन उपत्यका पुगेका थिए। जनैपूर्णिमाका दिन उत्तरगंगा नदीमा स्नान गरी ढोरबराह भगवानको पूजा–अर्चना गर्दा मनोकामना पूरा हुने धार्मिक विश्वास रहिआएको छ।

मन्दिरमा भाकल पूरा भएपछि भेँडाको बलि चढाउने परम्परासमेत रहेको छ। जनैपूर्णिमा तथा चण्डी पूर्णिमाका अवसरमा यहाँ विशेष पूजा–अर्चना र बलिसहित ठूलो मेला लाग्ने गर्दछ।

ढोरपाटन नगरपालिका–९ का वडाध्यक्ष खिमबहादुर घर्तिमगरका अनुसार म्याग्दी, रुकुम, रोल्पा, प्यूठान, गुल्मी, पर्वतलगायत छिमेकी जिल्लाबाट मात्र नभई सडक सुविधाका कारण देशका विभिन्न स्थानबाट श्रद्धालुहरू उत्तरगंगा ढोरबराहको दर्शनका लागि आउने गरेका छन्।

मन्दिर क्षेत्रमा सयौं भक्तजनले पूजा गरिरहेका छन् भने मनोकामना पूरा भएको विश्वासमा श्रद्धालुहरूले भेँडाको पाठो तथा साँढको बलि चढाउने गरेका छन्।

उत्तरगंगा नदीको उद्गमस्थलमा ढोरबराहको थान रहेकाले यस स्थानलाई उत्तरगंगा ढोरबराह नामले चिनिने गरिएको स्थानीय बताउँछन्। यहाँ सातमुले, बराहमुल तथा अन्य प्राकृतिक मुहान रहेका छन्। सातमुलेलाई उत्तरगंगा मूलसमेत भनिन्छ र यसै क्षेत्रबाट बाइसधारा निस्कने धार्मिक विश्वास छ।

बराहमूलमा रहेको बहरे गोरुलाई बराह देवताको रूपमा पूजा गर्ने परम्परा पनि रहेको छ। सन्तान प्राप्तिको कामना गर्ने श्रद्धालुहरूले बाइसधारामा स्नान गरी बहरे गोरुको पूजा गर्ने तथा २२ जोर धजा चढाउने गर्छन्।

धार्मिक तथा लोकविश्वासअनुसार जनैपूर्णिमाको दिन ढोरपाटन क्षेत्रमा विशेष धार्मिक महत्त्व रहेको छ। ढकमक्क फुलेका फूलबीच बलि राजा प्रकट हुने र उनको स्वागतका लागि उत्तरगंगा मेला लाग्ने लोककथनसमेत प्रचलित छ।

उत्तरबाहिनी नदीलाई पवित्र मानिने भएकाले यहाँ पितृलाई तर्पण दिने, मृतकका कपडा बगाउने तथा विभिन्न धार्मिक कर्म गर्ने परम्परा रहेको छ। मागेको वर पूरा भएपछि उत्तरगंगा बराह देवतालाई भेँडाको बलि चढाउने चलनले पनि यस क्षेत्रको धार्मिक तथा सांस्कृतिक महत्त्वलाई थप विशेष बनाएको छ।

Originally published on abcnews.com.np.