काठमाडौं । सरकारले जलविद्युत् आयोजनाका सुरुङमा फसेका कर्मचारी तथा कामदारको उद्धारका लागि विशेष अभियान सञ्चालन गरिरहेको जनाएको छ ।

त्रिशूली ‘थ्री ए’, त्रिशूली ‘थ्री बी’, त्रिशूली–१ लगायतका आयोजनामा फसेकाको उद्धारका लागि नेपाली सेनाका दक्ष प्राविधिक तथा विशेष उपकरण परिचालन गरिएको सरकारले जनाएको छ ।

नेपाली सेनाले लाङटाङ भोटेकोशी जलविद्युत् आयोजनाको सुरुङमा फसेका २५ जना कामदार तथा माथिल्लो त्रिशूली–१ जलविद्युत् आयोजनाको टनेलमा फसेका व्यक्तिसहित करिब ३५० जना मजदुर तथा स्थानीयको उद्धार गरिसकेको छ ।

ऊर्जा मन्त्रालयका प्रवक्ता मोहनकुमार शाक्यका अनुसार बाढी र प्रतिकूल मौसमका कारण प्रभावित जलविद्युत् आयोजना तथा प्रसारण संरचनामा आवश्यक प्राविधिक जनशक्ति, उपकरण र स्रोतसाधन परिचालन गरी पुनर्स्थापना तथा उद्धारका काम तीव्र पारिएको छ । प्रभावित क्षेत्रमा विद्युत् आपूर्ति सुचारु गर्ने कामसमेत भइरहेको उनले बताए ।

बाढी प्रभावित जलविद्युत् आयोजनामा कार्यरत कर्मचारी तथा मजदुरको अवस्थाबारे ऊर्जा मन्त्रालयले सम्बन्धित आयोजनाका व्यवस्थापक, स्वतन्त्र ऊर्जा उत्पादकहरूको संस्था नेपाल (इप्पान) र नेपाल विद्युत् प्राधिकरणका प्रतिनिधिसँग बैठक गरी विवरण अद्यावधिक गरिरहेको छ ।

प्रारम्भिक विवरणअनुसार प्रभावित क्षेत्रमा कार्यरत एक हजारभन्दा बढी कर्मचारी तथा कामदार सम्पर्कविहीन रहेको जानकारी प्राप्त भएको मन्त्रालयले जनाएको छ ।

उद्धार तथा खोजी कार्यलाई रातिको समयमा समेत प्रभावकारी बनाउन सुरक्षाकर्मीका लागि २०० थान हेडलाम्प र ९०० थान ब्याट्रीसमेत उपलब्ध गराइएको मन्त्रालयले जनाएको छ ।

Originally published on abcnews.com.np.