काठमाडौं । रसुवास्थित त्रिशूली–३ ‘ए’ जलविद्युत् आयोजनाको सुरुङभित्र मानिसहरू फसेको आशंकापछि उनीहरूको उद्धारका लागि सरकारले विगत दुई दिनदेखि जारी राखेको प्रयासलाई शनिबार थप तीव्र बनाएको छ ।

सुरुङभित्र मानिसहरू फसेको जानकारी प्राप्त भएपछि सरकारले प्राथमिकताका साथ उद्धार टोली परिचालन गरी लेदो तथा भग्नावशेष हटाउँदै सुरुङको प्रवेशद्वार खोल्ने काम अघि बढाएको हो ।

उद्धार तथा खोजी कार्यलाई तीव्र बनाउन नेपाली सेनाका ६२ जना तथा सशस्त्र प्रहरी बल नेपाल र नेपाल प्रहरीका २० जना गरी कुल ८२ जनाको संयुक्त टोली शनिबार बिहानैदेखि निरन्तर खटिएको छ ।

उद्धार टोलीले सुरुङको मुखमा थुप्रिएको लेदो, माटो तथा भग्नावशेष पन्छाएर भित्र प्रवेश गर्ने मार्ग खुलाउने प्रयास गरिरहेको छ । तर प्रभावित क्षेत्रमा अझै प्रतिकूल मौसम रहेकाले उद्धार कार्य चुनौतीपूर्ण बनेको छ ।

भारतीय उद्धार टोली पनि त्रिशूलीमा

यसैबीच, नेपाललाई उद्धार कार्यमा सहयोग गर्न भारतबाट आएको टोली त्रिशूली क्षेत्रमा पुगेको छ ।

भारतीय टोलीले हेलिकप्टरमार्फत चिलिमे र लाङटाङ क्षेत्रमा प्रारम्भिक हवाई अनुगमन (रेकी) गर्ने तयारी गरेको छ । अनुगमनबाट प्राप्त अवस्थाका आधारमा आवश्यक परे थप खोज तथा उद्धार अभियान सञ्चालन गर्ने योजना रहेको जनाइएको छ ।

भोटेकोशी बाढीपछि रसुवा र आसपासका जलविद्युत् आयोजनामा कार्यरत कर्मचारी तथा कामदारहरू सम्पर्कविहीन रहेको विवरण सार्वजनिक भइरहेका बेला सुरुङभित्र फसेकाको उद्धारलाई प्राथमिकतामा राखिएको हो ।

सुरुङको वास्तविक अवस्था, त्यसभित्र कति जना फसेका छन् र उनीहरूको अवस्थाबारे भने उद्धार टोलीले प्रवेशद्वार खोल्न सकेपछि मात्रै यकिन जानकारी प्राप्त हुने अपेक्षा गरिएको छ।

Originally published on abcnews.com.np.