काठमाडौं । प्रमुख प्रतिपक्षी नेपाली कांग्रेस संसदीय दलका नेता भीष्मराज आङ्देम्बेले प्रधानमन्त्री वालेन्द्र शाह (बालेन)सँग भेटवार्ता गर्दै भोटेकोशी बाढी प्रभावित रसुवा, नुवाकोट र धादिङमा उद्धार तथा राहत कार्यलाई थप प्रभावकारी बनाउन नौबुँदे ध्यानाकर्षणपत्र बुझाएका छन् ।

शनिबार बिहान ११ बजेदेखि साढे ११ बजेसम्म सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटवार्तामा आङ्देम्बेले बाढी प्रभावित क्षेत्रको स्थलगत अनुगमनका क्रममा देखिएका समस्या र तत्काल सम्बोधन गर्नुपर्ने विषय प्रधानमन्त्रीसमक्ष राखेका हुन् ।

आङ्देम्बे नुवाकोटको ढुंगेबजार, देवीघाटलगायत बाढी प्रभावित क्षेत्रको स्थलगत अनुगमन गरेर काठमाडौं फर्किएपछि प्रधानमन्त्री शाहलाई भेटेका थिए ।

ध्यानाकर्षणपत्रमार्फत उनले हवाई उद्धार, सडक तथा पुल सञ्चालन, विद्युत् र सञ्चार सेवा पुनःस्थापना, बेपत्ताको खोजी तथा शव व्यवस्थापन, घाइतेको उपचार र स्थानीय तहसँगको समन्वयलाई तत्काल प्राथमिकतामा राख्न सरकारसँग आग्रह गरेका छन् ।

छुट्टाछुट्टै हेलिकोप्टर उद्धार युनिट बनाउन माग

आङ्देम्बेले नेपाली सेनाले गरिरहेको हवाई उद्धारको प्रशंसा गर्दै रसुवा र नुवाकोटका लागि छुट्टाछुट्टै हेलिकोप्टर उद्धार युनिट बनाएर परिचालन गर्न माग गरेका छन् ।

भौगोलिक विकटता र सडक तथा पुलमा भएको क्षतिका कारण प्रभावित क्षेत्रमा स्थलमार्गबाट तत्काल पुग्न कठिन रहेकाले हवाई उद्धारलाई अझ व्यवस्थित र प्रभावकारी बनाउनुपर्ने उनको सुझाव छ ।

अवरुद्ध सडक खुलाउन र बेलीब्रिज राख्न आग्रह

बाढी तथा पहिरोका कारण अवरुद्ध रसुवा, नुवाकोट र धादिङका सडक तत्काल सञ्चालनमा ल्याउन पनि आङ्देम्बेले माग गरेका छन् ।

क्षतिग्रस्त १९ भन्दा बढी पुलमध्ये तत्काल कम्तीमा सात स्थानमा बेलीब्रिज जडान गर्नुपर्ने उनको सुझाव छ । सडक तथा पुल सञ्चालनमा आएपछि प्रभावित नागरिकको आवतजावतसँगै राहत तथा उद्धार सामग्री ढुवानीमा समेत सहज हुने उनको भनाइ छ ।

त्यस्तै, अवरुद्ध विद्युत् तथा सञ्चार सेवा तत्काल पुनःस्थापना गर्नुपर्ने उनले बताएका छन् । उद्धार, राहत वितरण र प्रभावित नागरिकसँगको समन्वयका लागि विद्युत् तथा सञ्चार सेवा अत्यावश्यक रहेको भन्दै उनले सरकारको ध्यानाकर्षण गराएका हुन् ।

बेपत्ताको खोजी र शव व्यवस्थापनमा तीव्रता माग

बाढीले बगाएर ल्याएका शव विभिन्न स्थानमा छरिएर रहेको भन्दै आङ्देम्बेले स्थलगत रूपमा थप खोजी तथा उद्धार टोली परिचालन गर्न माग गरेका छन् ।

बेपत्ता नागरिकको खोजी, फेला परेका शवको पहिचान तथा सम्मानजनक व्यवस्थापनलाई समेत प्राथमिकताका साथ अघि बढाउन उनले आग्रह गरेका छन् ।

उद्धार गरिएकालाई काठमाडौंसम्म पुर्‍याउन माग

सुरक्षित स्थानमा उद्धार गरिएका नागरिकलाई आवश्यकताअनुसार काठमाडौंसम्म ल्याउने यातायात व्यवस्था मिलाउनुपर्ने आङ्देम्बेको सुझाव छ ।

घाइते तथा ज्येष्ठ नागरिकको उपचारमा समेत विशेष ध्यान दिन उनले आग्रह गरेका छन् । नुवाकोट जिल्ला आयुर्वेद केन्द्रमा रहेका घाइतेका लागि आवश्यक अक्सिजन, औषधि तथा स्वास्थ्यकर्मीको व्यवस्था गर्न र ज्येष्ठ नागरिकका लागि पर्याप्त शय्या उपलब्ध गराउन उनले माग गरेका छन् ।

स्थानीय तह र सामाजिक संस्थासँग समन्वय

उद्धार तथा राहत कार्यमा स्थानीय सरकारसँग संघीय सरकारले प्रभावकारी समन्वय र सहकार्य गर्नुपर्ने आङ्देम्बेको भनाइ छ ।

राहत वितरण तथा उद्धारमा सहयोग गर्न इच्छुक सामाजिक संघसंस्थालाई समेत आवश्यक सहजीकरण गर्न उनले सरकारसँग आग्रह गरेका छन् ।

अन्तर्राष्ट्रिय उद्धार टोलीको सहयोग लिन सुझाव

सुरुङ, भग्नावशेष वा अन्य जोखिमपूर्ण स्थानमा मानिस फसेको सम्भावना रहेकाले आवश्यकताअनुसार अन्तर्राष्ट्रिय उद्धारकर्ता तथा विशेषज्ञको सहयोग लिन पनि आङ्देम्बेले सरकारलाई सुझाव दिएका छन् ।

विशेषगरी सुरुङ तथा भग्नावशेषभित्र फसेका नागरिकको जीवितै उद्धारका लागि विशेष प्रविधि र दक्ष जनशक्ति आवश्यक पर्न सक्ने भन्दै उनले उपलब्ध अन्तर्राष्ट्रिय सहयोग उपयोग गर्न आग्रह गरेका हुन् ।

त्यसैगरी त्रिशूलीलगायत नदी क्षेत्रमा आवतजावतका लागि आवश्यक स्थानमा तुइनको शीघ्र व्यवस्था गर्न पनि उनले माग गरेका छन् ।

आङ्देम्बेले विपद्को यस कठिन घडीमा नागरिकको जीवन रक्षा नै सर्वोच्च प्राथमिकता हुनुपर्ने भन्दै उद्धार, राहत र पुनःस्थापनाका कार्यलाई थप तीव्र र प्रभावकारी बनाउन सरकारको विशेष ध्यानाकर्षण गराएका छन् ।

Originally published on abcnews.com.np.