काठमाडौं । काठमाडौं महानगरपालिकाले रसुवाको भोटेकोशी बाढीबाट प्रभावित क्षेत्रको विपद् व्यवस्थापन तथा राहतका लागि चार करोड ५४ लाख १४ हजार ७८७ रुपैयाँ बराबरको सहयोग गर्ने भएको छ ।

महानगरपालिकाको ५७औँ कार्यपालिका बैठकले बाढी प्रभावित नागरिकका लागि आवश्यक खाद्यान्न, लत्ताकपडा, पिउने पानी, त्रिपाल, कम्बललगायत सामग्री उपलब्ध गराउने निर्णय गरेको हो ।

महानगरका कार्यवाहक प्रमुख सुनिता डंगोलका अनुसार विपद् व्यवस्थापन समितिलाई आवश्यकताअनुसार इन्डक्सनसहितका भाँडावर्तन, सिलिन्डर, एम्बुलेन्स, यातायातका साधन, शववाहन, एक्साभेटर र जेट मेसिन लगायतका साधन तथा सामग्री व्यवस्थापन गर्ने जिम्मेवारी दिइएको छ । आवश्यक जनशक्तिसमेत परिचालन गरिनेछ ।

विपद् कोषबाट ३ करोड

कुल सहयोगमध्ये महानगरपालिकाको विपद् व्यवस्थापन कोषबाट तीन करोड रुपैयाँ उपलब्ध गराइनेछ ।

बाँकी रकम जनप्रतिनिधि तथा कर्मचारीको पारिश्रमिक र सुविधाबाट संकलन गरिनेछ । त्यसका लागि कार्यपालिका सदस्यको एक महिनाको सुविधा, वडा सदस्यको पाँच दिनको सुविधा तथा सहरी योजना आयोगका पदाधिकारी र सहायक विज्ञको सात दिन बराबरको पारिश्रमिक तथा सुविधा रकम जम्मा गरिनेछ ।

त्यस्तै, महानगरमा कार्यरत अधिकृतस्तरका कर्मचारीको सात दिन, सहायकस्तरका कर्मचारीको पाँच दिन तथा श्रेणीविहीन कर्मचारीको दुई दिन बराबरको पारिश्रमिकबाट समेत सहयोग रकम संकलन गरिने महानगरले जनाएको छ ।

‘उद्धारपछि पनि पुनःस्थापना आवश्यक’

कार्यवाहक प्रमुख डंगोलले विपद् व्यवस्थापनलाई तत्काल उद्धारमा मात्र सीमित गर्न नहुने बताइन् ।

उनका अनुसार प्रभावित नागरिकलाई जोखिमयुक्त स्थानबाट सुरक्षित स्थानमा पुर्‍याएपछि दैनिक जीवन सहज बनाउने र दीर्घकालीन पुनःस्थापनासम्मका काम पनि जिम्मेवारीपूर्वक अघि बढाउन आवश्यक छ ।

बाढी प्रभावित क्षेत्रका नागरिकसँगै काठमाडौंमा अध्ययन गरिरहेका विद्यार्थी तथा अस्पतालमा कुरुवा वा सहयोगी नभएका बिरामीको हेरचाहसम्मका विषयमा पनि महानगरले सहयोग गर्नुपर्ने उनले बताइन् ।

बैठकमा महानगरका प्रवक्ता नवीन मानन्धरले भदौ १० गते बाढी आएदेखि महानगरले खोज तथा उद्धार र मानवीय सहायताका क्षेत्रमा गरिरहेका कामबारे जानकारी गराएका थिए । विपद् व्यवस्थापन समितिका संयोजक प्रेम थापाले समितिले गरेका निर्णय तथा तिनको कार्यान्वयनबारे बैठकलाई जानकारी गराएका थिए ।

Originally published on abcnews.com.np.