काठमाडौं, ६ वैशाख । फुटबल क्लब सरस्वती युथको पूर्व कप्तान दिपेश श्रेष्ठलाई चोरीको अभियोगमा पक्राउ गरिएको छ । चोरीको माल किनेबेच गर्ने कार्यमा संलग्न रहेको अभियोगमा उनलाई पक्राउ गरिएको हो ।

महानगरीय प्रहरी परिसर काठमाडौंले मोबाईल, ल्यापटप लगायतका सामग्री चोरी गरेर विक्री वितरण हुने गरेको सूचना पाएको थियो । सोही लाई पछ्याउदै प्रहरीले बुधबार काठमाडौं–६, रेम्बोडाँडाबाट बाच्छो भनिने सुवास खड्कालाई शंकास्पद अवस्थामा भेटेको थियो ।

खड्कालाई नियन्त्रणमा लिएर सोधपुछ गर्दा उनले साथीसँग मिलेर चोरीका सामान किनबेच गर्ने गरेको बयान दिएका थिए ।

यही बयानका आधारमा प्रहरी टोली श्रेष्ठसम्म पुगेको हो । प्रहरीका अनुसार चोरीका सामान फुटबलर श्रेष्ठको कोठामा लुकाएर राख्ने गरेको पाइएको छ ।

खनतलासीका क्रममा श्रेष्ठको कोठाबाट विभिन्न ब्रान्डका ३३ वटा मोबाइल, दुई वटा आइफोन, ३ वटा पावर बैंक, सोनी कम्पनीको ३२ इन्जको टिभी एक थान, ५ वटा ल्यापटप लगायतका सामग्री बरामद भएको छ ।

हाल प्रहरी हिरासतमा रहेका श्रेष्ठले चोरीमा संलग्न भएको स्वीकार गरेका छन् । सुवाससँग एक वर्षदेखि चिनजान रहेको र साथीकै लहैलहैमा लागेर चोरी गरेको उनले बताएका छन् ।

चोरीका सामानहरु फेसबुक ग्रुप र अनलाइन किनबेच गर्ने वेवसाइटमार्फत विक्री वितरण गर्दै आएको बयान दिएका छन् ।

पक्राउ परेका दुवै जनामाथि मुलुकी ऐनको चोरीको महल बमोजिम सजाय हुने परिसरका प्रमुख प्रहरी वरिष्ठ उपरीक्षक (एसएसपी) विश्वराज पोखरेलले जानकारी दिए ।

सरस्वती युथ क्लब नेपालको ‘ए’ डिभिजन क्लब हो । क्ल्बले पछिल्लो पटक २०१३–१४ मा ‘ए’ डिभिजन लिग खेल्दा दिपेश श्रेष्ठ टोलीका प्रमुख सदस्य थिए । लामो समयदेखि ‘ए’ डिभिजन लिग भएको छैन, अहिले सरस्वती क्लब निक्रिय जस्तै भएको छ ।