काठमाडौं । रसुवाको भोटेकोसी नदीमा आएको विनाशकारी बाढीपछि काभ्रेका ४१ जना अझै सम्पर्कविहीन रहेका छन्। बाढीपछि सम्पर्कविहीन भएका आठ जना भने परिवारको सम्पर्कमा आइसकेका छन्।

जिल्ला प्रशासन कार्यालय काभ्रेले बाढी प्रभावित क्षेत्रमा रहेका जिल्लावासीको अवस्था बुझ्न सार्वजनिक अपिल गर्दै हालसम्म सम्पर्कविहीन रहेका नागरिकको नामावली अद्यावधिक गरेको जनाएको छ।

प्रमुख जिल्ला अधिकारी गोपालकुमार अधिकारीका अनुसार बाढीपछि सम्पर्कविहीन भएका आठ जना परिवारको सम्पर्कमा आए पनि ४१ जनाको अवस्था अझै अज्ञात छ।

प्रशासनले रोजगारी, व्यापार, भ्रमण तथा अन्य कामका सिलसिलामा बाढी प्रभावित क्षेत्रमा पुगेका काभ्रेका नागरिकको अवस्था बुझ्न पहल गरिरहेको जनाएको छ।

बनेपा र तेमालका सबैभन्दा धेरै

प्रशासनले सार्वजनिक गरेको विवरणअनुसार सम्पर्कविहीन हुनेमा बनेपाका सात र तेमाल गाउँपालिकाका सात जना छन्।

त्यस्तै धुलिखेलका छ, पाँचखाल र भुम्लुका चार–चार जना सम्पर्कविहीन छन्।

पनौती, चौँरीदेउराली र बेथानचोकका तीन–तीन जना तथा मण्डनदेउपुर र रोशी गाउँपालिकाका एक–एक जना सम्पर्कविहीन रहेको प्रशासनले जनाएको छ। काभ्रेकै एक जना सम्पर्कविहीन व्यक्तिको ठेगाना भने खुलेको छैन।

परिवारलाई तत्काल जानकारी गराउन आग्रह

प्रशासनले बाढी प्रभावित क्षेत्रमा रहेका आफ्ना परिवारका सदस्यसँग तत्काल सम्पर्क गरी उनीहरूको अवस्था बुझ्न आग्रह गरेको छ।

कुनै परिवारका सदस्य सम्पर्कविहीन भएमा नजिकको प्रहरी कार्यालय, स्थानीय तह वा जिल्ला प्रशासन कार्यालयमा तत्काल जानकारी गराउन पनि अनुरोध गरिएको छ।

प्रशासनका अनुसार सम्पर्कविहीनको सूची निरन्तर अद्यावधिक गरिनेछ। सम्पर्कमा आएका व्यक्तिबारे पनि प्रशासनलाई जानकारी गराउन आग्रह गरिएको छ, ताकि खोजी तथा उद्धार कार्यलाई थप व्यवस्थित बनाउन सकियोस्।

Originally published on abcnews.com.np.