काठमाडौं । रसुवाको भोटेकोसी नदीमा आएको विनाशकारी बाढीमा परी मृत्यु हुनेको संख्या ९३९ पुगेको छ। अझै ३ हजार ९२५ जना सम्पर्कविहीनरहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।

प्राधिकरणका अनुसार सोमबार साँझ ६ बजेसम्म नदी किनार तथा विभिन्न प्रभावित क्षेत्रमा ९३९ शव फेला परेका छन्। बाढीले बगाएर ल्याएका शव नदी किनारका विभिन्न स्थानमा फेला पर्ने क्रम जारी रहेको छ।

सबैभन्दा धेरै शव चितवनमा २७९ फेला परेका छन्। यस्तै, नवलपरासी पूर्वमा २१६, नवलपरासी पश्चिममा १६८, नुवाकोटमा ९५, गोरखामा ६५, धादिङमा ५५, तनहुँमा ३८ र रसुवामा २३ शव फेला परेको प्राधिकरणले जनाएको छ।

जलविद्युत् आयोजनाका ६३९ जना सम्पर्कविहीन

बाढीपछि हालसम्म ३ हजार ९२५ जना सम्पर्कविहीन रहेको प्राधिकरणको तथ्यांक छ।

सम्पर्कविहीनमध्ये सबैभन्दा ठूलो संख्या रसुवा र नुवाकोटका जलविद्युत् आयोजनामा कार्यरत कर्मचारी तथा मजदुरको रहेको छ। ती आयोजनामा काम गर्ने ६३९ जना अझै सम्पर्कमा आउन नसकेको प्राधिकरणले जनाएको छ।

बाढीले रसुवा, नुवाकोट र आसपासका क्षेत्रमा रहेका विभिन्न जलविद्युत् आयोजनाका संरचना तथा सुरुङमा समेत ठूलो क्षति पुर्‍याएपछि नेपाली सेना, नेपाल प्रहरी, सशस्त्र प्रहरी तथा विदेशी विशेषज्ञसहितको टोलीले सुरुङभित्र फसेका तथा सम्पर्कविहीन व्यक्तिको खोज तथा उद्धार जारी राखेको छ।

विशेषगरी माथिल्लो त्रिशूली–३ ए, माथिल्लो त्रिशूली–३ बी, चिलिमे, रसुवागढी, लाङटाङ र माथिल्लो त्रिशूली–१ लगायतका आयोजनाका सुरुङमा उद्धार टोली परिचालन गरिएको छ। खोज तथा उद्धारसँगै प्रभावित क्षेत्रमा फेला परेका शवको पहिचान र व्यवस्थापनको कामसमेत भइरहेको छ।

Originally published on abcnews.com.np.