काठमाडौं, भदौ १७ गते । जल तथा मौसम विज्ञान विभागअन्तर्गत बाढी पूर्वानुमान महाशाखाले आगामी तीन दिन कोशी, नारायणी, कर्णाली, महाकालीलगायतका प्रमुख नदी तथा तिनका सहायक नदीमा पानीको बहाव उल्लेख्य रूपमा बढ्ने पूर्वानुमान गरेको छ। महाशाखाका अनुसार भोटेकोसीमा आएको बाढीपछि अहिले भोटेकोसी र त्रिशूली नदीको बहाव सतर्कता तहभन्दा तल रहे पनि जोखिम कायमै रहेकाले उच्च सतर्कता अपनाउनुपर्ने देखिएको छ। कोशी, नारायणी, कर्णाली, महाकालीलगायतका नदी तथा तिनका सहायक नदीमा समेत पानीको बहाव बढ्ने अनुमान गरिएको छ। बाढी पूर्वानुमान बुलेटिनमा बुधबार, बिहीबार र शुक्रबार अधिकांश नदीमा बहाव उल्लेख्य रूपमा बढ्ने जनाइएको छ। विशेषगरी त्रिशूली र वेत्रावतीलगायत केही नदीमा आज र भोलि उच्च जोखिम रहेको महाशाखाले जनाएको छ। साना नदी तथा खोलामा भने आकस्मिक बाढी आउन सक्ने सम्भावना रहेको छ। ताप्लेजुङ, सङ्खुवासभा, सोलुखुम्बु, रामेछाप, दोलखा, सिन्धुपाल्चोक, काभ्रेपलाञ्चोक, काठमाडौं, धादिङ, मकवानपुर, चितवन, गोरखा, तनहुँ, लमजुङ, मनाङ, कास्की, स्याङ्जा, पर्वत, म्याग्दी, बागलुङ, रुकुम, रोल्पा, सल्यान र सुर्खेतलगायतका जिल्लाका साना नदी तथा खोलामा आकस्मिक बाढीको जोखिम औँल्याइएको छ। महाशाखाले नदी तथा खोलाको तटीय क्षेत्रमा बसोबास गर्ने नागरिकलाई सतर्क रहन, जोखिमयुक्त क्षेत्रमा नजान तथा आवश्यक सावधानी अपनाउन आग्रह गरेको छ। नदीको बहाव बढ्दा तटीय क्षेत्रमा डुबान तथा बाढीको जोखिम बढ्न सक्ने भएकाले विशेष सावधानी अपनाउन महाशाखाले अनुरोध गरेको छ।

Originally published on abcnews.com.np.