काठमाडौं । काठमाडौंको नागढुंगा चेकपोस्टनजिक सडक भासिएपछि यातायात प्रभावित भएको छ।

बुधबार बिहान चेकपोस्टको तल करिब ८० मिटर लम्बाइ र तीन मिटर चौडाइमा सडक भासिएको नागढुंगा–मुग्लिङ सडक योजना (पूर्वी खण्ड) का इन्जिनियर राजीव मानन्धरले जानकारी दिए।

सडक भासिएपछि उक्त खण्डमा अहिले एकतर्फी रूपमा मात्र सवारीसाधन सञ्चालन भइरहेका छन्।

मानन्धरका अनुसार मालवाहक तथा सामान्य सवारीसाधनलाई सुरुङमार्गबाट आवतजावतको व्यवस्था मिलाइएको छ। मोटरसाइकल तथा तेल र ग्यास बोकेका सवारीसाधनलाई भने भासिएको सडकबाटै पास गराइएको छ।

सडकको अवस्था निरीक्षण गर्न सडक विभागको टोली घटनास्थलतर्फ आउँदै गरेको उनले बताए। टोलीले स्थलगत निरीक्षण गरेपछि सडक मर्मत तथा यातायात व्यवस्थापनबारे आवश्यक निर्णय गरिनेछ।

सडक भासिएसँगै नागढुंगा हुँदै काठमाडौं भित्रिने तथा बाहिरिने सवारीसाधनमा थप चाप र आवागमनमा समस्या हुन सक्ने भएकाले यात्रुलाई सावधानी अपनाउन आग्रह गरिएको छ।

Originally published on abcnews.com.np.