नुवाकोट । भोटेकोसी हुँदै त्रिशूली नदीमा आएको बाढीमा परेर ज्यान गुमाएका व्यक्तिको शव व्यवस्थापनअन्तर्गत नुवाकोटमा शव खोजतलास तथा सङ्कलनको प्रारम्भिक चरण पूरा भएको छ। जिल्ला प्रहरी कार्यालय नुवाकोटका प्रमुख प्रहरी उपरीक्षक विपिन रेग्मीका अनुसार जमिनको सतहमा रहेका शवको खोजतलास तथा सङ्कलनका क्रममा हालसम्म १७७ जनाको शव फेला परेको छ। तीमध्ये १६ जनाको पहिचान भएपछि सम्बन्धित परिवारलाई बुझाइएको छ। पहिचान हुन नसकेका बाँकी शव परीक्षणका लागि काठमाडौंस्थित शिक्षण अस्पताल महाराजगञ्ज पठाइएको प्रहरीले जनाएको छ। एसपी रेग्मीका अनुसार नेपाली सेनाको हेलिकप्टरसहित नेपाल प्रहरीको ड्रोन क्यामेरा र तालिमप्राप्त कुकुर परिचालन गरी जिल्लाका विभिन्न ३० स्थानलाई आधार इलाका बनाएर शव खोजतलास तथा सङ्कलन गरिएको थियो। ‘जमिनको सतह तथा घरभित्र देखिने अवस्थामा रहेका शव सङ्कलन गरिएको छ। कहीँकतै शव देखिएमा तत्काल प्रहरीलाई खबर गर्न अनुरोध गरेका छौँ,’ एसपी रेग्मीले भने। बाढीका क्रममा सार्वजनिक सवारीसाधन रोकेर सुरक्षित स्थान ठानी आश्रय लिएका व्यक्तिहरू पनि ती क्षेत्रमा रहेको जनाइएको छ। उक्त स्थानबाट सङ्कलन भएका अधिकांश शव बेत्रावतीमा पहिचान हुन नसकेपछि परीक्षणका लागि काठमाडौं पठाइएको प्रहरीले जनाएको छ। यसअघि जिल्लाका विभिन्न ३० स्थानमा परिचालन गरिएको शव सङ्कलन टोली अब मुख्य प्रभावित क्षेत्रका बस्तीमा केन्द्रित भएको छ।

Originally published on abcnews.com.np.