काठमाडौं । रसुवाको भोटेकोसीमा आएको बाढीका कारण २१६ मेगावाटको माथिल्लो त्रिशूली–१ जलविद्युत् आयोजनामा कार्यरत ५५७ जना अझै सम्पर्कविहीन रहेका छन् । आयोजना प्रवर्द्धक नेपाल वाटर एन्ड इनर्जी डेभलपमेन्ट कम्पनी प्रालिले बुधबार विज्ञप्ति जारी गर्दै आयोजनास्थलबाट ८७६ जनाको उद्धार गरिएको जनाएको छ । सम्पर्कविहीनमध्ये करिब ११५ जना हेडवर्क्स क्षेत्र तथा मुख्य सुरुङभित्र फसेको आशंका गरिएको कम्पनीले जनाएको छ । अत्यन्त विकट भौगोलिक अवस्था, बाढीबाट भएको व्यापक क्षति, सुरुङभित्रको जोखिम, थप पहिरोको सम्भावना तथा प्रतिकूल मौसमका कारण खोज तथा उद्धार कार्य चुनौतीपूर्ण बनेको कम्पनीको भनाइ छ । कम्पनीले सरकारका सम्बन्धित निकायसँग समन्वय गरी उपलब्ध स्रोत, साधन, प्रविधि र दक्ष जनशक्ति परिचालन गरेर बेपत्ता व्यक्तिको खोज तथा उद्धारलाई उच्च प्राथमिकतामा राखी निरन्तरता दिएको जनाएको छ । खोज तथा उद्धारका लागि कम्पनीको पहलमा कोरियाबाट विज्ञ तथा आवश्यक उपकरण नेपाल ल्याई आयोजनास्थलमा परिचालन गरिएको विज्ञप्तिमा उल्लेख छ । बाढीका कारण रसुवाको आमाछोदिङ्मो गाउँपालिका–१, हाकु क्षेत्र तथा उत्तरगया गाउँपालिका–१ मा निर्माणाधीन आयोजनामा ठूलो जनधनको क्षति पुगेको छ । आन्तरिक खपतका लागि विद्युत् उत्पादन गर्ने लक्ष्य राखिएको माथिल्लो त्रिशूली–१ प्रत्यक्ष वैदेशिक लगानीमा निर्माणाधीन नेपालकै ठूलो जलविद्युत् आयोजना हो । आयोजनाको बाँधस्थल, मुख्य सुरुङ, भूमिगत विद्युत्गृहलगायत संरचनामा २०८४ साउनभित्र निर्माण सम्पन्न गर्ने लक्ष्यसहित काम भइरहेको थियो । बाढीले निर्माण सम्पन्न हुन लागेको बाँधलगायत हेडवर्क्सका संरचना, कार्यालय तथा आवास क्षेत्र पूर्णरूपमा बगाएको कम्पनीले जनाएको छ । बाढी आउनुअघि पूर्वसूचना जारी गरिएको भए पनि अत्यन्त छोटो समयमा ठूलो बाढी र लेदो आयोजनास्थलमा प्रवेश गरेकाले निर्माणस्थल तथा कार्यालयमा कार्यरत अधिकांश कर्मचारी र श्रमिक सुरक्षित स्थानतर्फ जान नसकेको कम्पनीको भनाइ छ ।

Originally published on abcnews.com.np.