काठमाडौं । रसुवाको भोटेकोसी क्षेत्रमा भदौ १० गते आएको विनाशकारी बाढीबाट प्रभावित समुदायका लागि चिनियाँ संस्था चाइना फाउन्डेसन फर रुरल डेभलपमेन्ट (सीएफआरडी) ले २७ टन राहत सामग्री नेपाल ल्याएको छ।

सीएफआरडीले सञ्चालन गरेको ‘८.२६ नेपाल मडस्लाइड रेस्क्यु अपरेसन’ अन्तर्गत पहिलो चरणको राहत सामग्री बिहीबार त्रिभुवन अन्तर्राष्ट्रिय विमानस्थलमा आइपुगेको हो।

बाढीको लेदो, ढुंगा र तीव्र बहावका कारण रसुवाका बस्ती, सडक, पुल तथा अन्य पूर्वाधारमा ठूलो क्षति पुगेपछि सीएफआरडीको नेपाल कार्यालयले तत्काल आपतकालीन प्रतिक्रिया संयन्त्र सक्रिय गरेको थियो। संस्थाले प्रभावित क्षेत्रको अवस्था मूल्यांकनसँगै राहत वितरणको काम पनि अघि बढाएको जनाएको छ।

पहिलो चरणमा चीनबाट ल्याइएको राहत सामग्रीमा १७५ वटा पाल, १ हजार कम्बल, १ हजार न्यानो कपासका कोट, १ हजार आपतकालीन मानवीय राहत बाकस र ६ हजार मेडिकल प्याकिङ ब्याग रहेका छन्।

करिब २७ टन तौलका यी राहत सामग्रीको मूल्य १० लाख चिनियाँ युआनभन्दा बढी रहेको सीएफआरडीले जनाएको छ। नेपाल सरकारको विपद् व्यवस्थापन संयन्त्रसँग समन्वय गरी ती सामग्री रसुवाका बाढी प्रभावित क्षेत्रमा पठाइने तयारी गरिएको छ।

यसअघि पनि सीएफआरडीले नुवाकोटका प्रभावित क्षेत्रमा १४ वटा पाल, ५०० खाद्यान्न प्याकेज, ५०० परिवारका लागि जीवनयापन सामग्री तथा ५ हजार सौर्य बत्ती उपलब्ध गराउने प्रक्रिया अघि बढाइसकेको छ। खाद्यान्न प्याकेजमा चामल, तेल र दाललगायत दैनिक उपभोग्य सामग्री समावेश छन्।

सीएफआरडीले प्रभावित समुदायको आवश्यकता र अवस्थाको निरन्तर मूल्यांकन गर्दै आगामी दिनमा पनि मानवीय सहयोगलाई निरन्तरता दिने जनाएको छ।

राहत सामग्री जुटाउन हाइफ्लायर क्वान्ट, बेइजिङ टोङसिनयुआन र झेजियाङ अन्जिहुई लगायतका चिनियाँ उद्यम तथा सहयोगी संस्थाले योगदान गरेका छन्।

नेपालमा सीएफआरडीको मानवीय सहकार्य भने पहिलोपटक भएको होइन। २०७२ सालको विनाशकारी भूकम्पपछि आपतकालीन उद्धार र पुनर्निर्माणबाट सुरु भएको संस्थाको नेपाल संलग्नता पछिल्लो समय समुदाय विकास, युवा तालिम, स्वच्छ खानेपानी, कृषि विकास तथा विपद् व्यवस्थापनसम्म विस्तार भएको छ।

संस्थाका अनुसार कोभिड–१९ महामारीका साथै जाजरकोट, सिन्धुपाल्चोक र गोरखालगायतका विपद्का समयमा पनि सीएफआरडीले नेपालमा मानवीय सहायता उपलब्ध गराएको थियो।

Originally published on abcnews.com.np.