काठमाडौं । परराष्ट्र मन्त्रालयले प्रधानमन्त्री वालेन्द्र शाह (बालेन) को न्युयोर्क भ्रमणको तयारी सुरु गरेको छ ।

प्रधानमन्त्री शाहले संयुक्त राष्ट्रसंघको ८१औँ महासभामा सहभागी हुन आफू न्युयोर्क जाने संकेत गरेपछि मन्त्रालयले भ्रमणको प्रारम्भिक तयारी अघि बढाएको हो ।

संयुक्त राष्ट्रसंघको ८१औँ महासभा आगामी असोजको पहिलो साता अमेरिकाको न्युयोर्कमा आयोजना हुँदैछ ।

प्रधानमन्त्रीको भ्रमण औपचारिक रूपमा टुंगो लागिनसकेको भए पनि उहाँले जाने संकेत गरेपछि तयारी अघि बढाइएको परराष्ट्र मन्त्रालयका उच्च अधिकारीले बताएका छन् ।

“प्रधानमन्त्रीज्यू जाने निर्णय नै भएको भने छैन । तर, उहाँले जाने संकेत गर्नुभएको कारण भ्रमणको तयारी गरिएको हो,” परराष्ट्र मन्त्रालय उच्च स्रोतले जनाएको छ ।

भोटेकोसी बाढीपछि बदलिए प्रधानमन्त्रीको योजना

प्रधानमन्त्री शाहले यसअघि संयुक्त राष्ट्रसंघको महासभामा आफू सहभागी नहुने निर्णय गरेका थिए । त्यसपछि परराष्ट्रमन्त्री शिशिर खनालको नेतृत्वमा नेपाली प्रतिनिधिमण्डल महासभामा सहभागी हुने निर्णय मन्त्रिपरिषद्ले गरेको थियो ।

तर, भदौ १० गते रसुवामा आएको भीषण भोटेकोसी बाढीबाट ठूलो जनधनको क्षति भएपछि प्रधानमन्त्री शाहले जलवायु परिवर्तनका मुद्दा अन्तर्राष्ट्रिय मञ्चमा उठाउन आफू स्वयं महासभामा सहभागी हुने संकेत गरेका हुन् ।

बाढी तथा पहिरोबाट नेपालमा भएको क्षति र हिमाली क्षेत्रमा जलवायु परिवर्तनको बढ्दो प्रभावलाई अन्तर्राष्ट्रिय समुदायसमक्ष प्रस्तुत गर्ने अवसरका रूपमा महासभालाई उपयोग गर्ने प्रधानमन्त्रीको तयारी रहेको बताइएको छ ।

खनालको निर्देशनमा तयारी

प्रधानमन्त्री शाहले महासभामा सहभागी हुने संकेत गरेपछि परराष्ट्रमन्त्री शिशिर खनालको निर्देशनमा मन्त्रालयले भ्रमणको तयारी अघि बढाएको हो ।

यद्यपि प्रधानमन्त्रीको भ्रमणबारे अन्तिम निर्णय र औपचारिक कार्यतालिका भने अझै तय हुन बाँकी रहेको परराष्ट्र मन्त्रालय स्रोतले जनाएको छ ।

Originally published on abcnews.com.np.