काठमाडौं । श्रीलंकाका कप्तान कुशल मेन्डिसले इंग्ल्यान्डविरुद्धको आगामी तीन खेलको टी–२० अन्तर्राष्ट्रिय शृंखला गुमाउने भएका छन् ।

श्रीलंका क्रिकेटका अनुसार मेन्डिस दायाँ ह्यामस्ट्रिङको चोटबाट पुनरागमनका लागि उपचार तथा पुनर्स्थापना प्रक्रियामा रहेकाले टी–२० शृंखलामा उपलब्ध हुने छैनन् । उनको अनुपस्थितिमा उपकप्तान चरिथ अस्लंकाले श्रीलंकाको कप्तानी सम्हाल्नेछन् ।

यसैगरी तीव्र गतिका बलर बिनुरा फर्नान्डो पनि शृंखलाबाट बाहिरिएका छन् । उनी ढाडको चोटबाट निको हुने क्रममा छन् । फर्नान्डोको स्थानमा दिलशान मदुशंकालाई टोलीमा समावेश गरिएको छ भने मेन्डिसको स्थानमा पवन रथनायकेलाई राखिएको छ ।

इंग्ल्यान्ड र श्रीलंकाबीचको तीन खेलको टी–२० शृंखला सेप्टेम्बर १५ देखि १९ सम्म हुनेछ । पहिलो खेल साउथह्याम्पटनमा सेप्टेम्बर १५, दोस्रो कार्डिफमा सेप्टेम्बर १७ र तेस्रो खेल म्यानचेस्टरमा सेप्टेम्बर १९ मा हुनेछ ।

टी–२० पछि दुई टोलीबीच तीन खेलको एकदिवसीय अन्तर्राष्ट्रिय शृंखला पनि हुनेछ । एकदिवसीय टोलीमा भने मेन्डिसलाई समावेश गरिएको छ । त्यसैले उनको फिटनेसका आधारमा उनले ओडीआई शृंखला खेल्ने वा नखेल्ने टुंगो लाग्नेछ ।

एकदिवसीय शृंखलाका खेलहरू सेप्टेम्बर २२, २४ र २७ मा हुनेछन् ।

Originally published on abcnews.com.np.