काठमाडौं । नेपालले एसीसी प्रिमियर कपमा लगातार दोस्रो जित निकाल्दै सेमिफाइनल सम्भावना बलियो बनाएको छ। बिहीबार नेपालले घरेलु टोली मलेसियालाई ६ विकेटले पराजित गरेको हो। मलेसियाले दिएको १०४ रनको लक्ष्य नेपालले २१.४ ओभरमा चार विकेट गुमाएर पूरा गर्‍यो। नेपालका अर्जुन कुमालले अविजित ४५ रन बनाए। उनले ६८ बलमा चार चौका प्रहार गरे। इशान पाण्डेले २०, रोहितकुमार पौडेलले १० तथा दीपेन्द्रसिंह ऐरीले अविजित १२ रन बनाए। अर्जुन र इशानबीच तेस्रो विकेटका लागि ५७ रनको साझेदारी भएको थियो। मलेसियाका वीरनदीप सिंह, प्रशान्त मधुकर, आरिफ उल्लाह र कप्तान सैयद अजिजले एक/एक विकेट लिए। यसअघि टस जितेर पहिले ब्याटिङ गरेको मलेसिया ३२.३ ओभरमा १०३ रनमा अलआउट भएको थियो। कप्तान सैयद अजिजले ३०, अकिल वाहिदले २४, वीरनदीप सिंहले १४ र मोहम्मद स्याहदत रमीलले १३ रन बनाए। नेपालका करण केसीले चार विकेट लिए। ललितनारायण राजवंशीले दुई तथा हेमन्त धामी, दीपेन्द्रसिंह ऐरी र कप्तान सन्दीप लामिछानेले एक/एक विकेट लिए। जितसँगै दुई खेलबाट चार अंक जोडेको नेपाल समूह ‘ए’को शीर्ष स्थानमा पुगेको छ। पहिलो खेलमा नेपालले बहराइनलाई सात विकेटले पराजित गरेको थियो। नेपालले अब आइतबार साउदी अरेबियासँग खेल्नेछ।

Originally published on abcnews.com.np.