काठमाडौं । नेकपा (एमाले)का महासचिव शंकर पोखरेलले भोटेकोसी बाढीजस्ता विपद्बाट नेपालले व्यहोर्नुपरेको क्षतिको क्षतिपूर्ति जलवायु परिवर्तनमा बढी योगदान गर्ने विकसित राष्ट्रबाट पाउनुपर्ने बताएका छन्।

एमाले विशेष संगठन कमिटीले पार्टी कार्यालय च्यासलमा आयोजना गरेको कार्यक्रममा बोल्दै महासचिव पोखरेलले औद्योगिक राष्ट्रबाट हुने उच्च कार्बन उत्सर्जनका कारण नेपालजस्ता विकासशील तथा हिमाली मुलुकले ठूलो क्षति व्यहोर्नुपरेको बताए।

उनले विकसित देशहरूले ठूला उद्योग तथा आणविक भट्टीबाट ठूलो मात्रामा कार्बन उत्सर्जन गर्दा वातावरणमा परिवर्तन आएको र त्यसको प्रत्यक्ष असर विकासशील मुलुकमा परेको बताए।

“विकसित देशहरूले ठूलाठूला उद्योग र आणविक भट्टीबाट कार्बन उत्सर्जन बढी भई वातावरण परिवर्तन भइरहेको र त्यसको मार नेपालजस्ता विकासशील देशहरूमा परेको छ,” पोखरेलले भने, “त्यसबाट हिमाली मुलुक नेपाल प्रभावित भई बर्सेनि ठूलो धनजनको नोक्सान व्यहोर्नुपरेको छ।”

जलवायु परिवर्तनमा नेपालको योगदान न्यून भए पनि त्यसको असर भने गम्भीर रूपमा भोग्नुपरेको उनको भनाइ थियो। त्यसैले जलवायु न्यायको सिद्धान्तअनुसार प्रभावित मुलुकले क्षतिपूर्ति पाउनुपर्ने उनले बताए।

पोखरेलले भोटेकोसी बाढीपछि एमालेका नेता तथा विभिन्न जनसंगठनका कार्यकर्ता प्रभावित क्षेत्रमा पुगेर उद्धार तथा राहत वितरणमा सक्रिय रहेको पनि बताए।

उनका अनुसार पार्टीका नेता तथा जनसंगठनहरू बाढी आएको समयदेखि नै प्रभावित क्षेत्रमा परिचालित भएर उद्धार, राहत तथा सहयोगका काममा खटिएका छन्।

भोटेकोसी बाढीले ठूलो जनधनको क्षति पुर्‍याएको सन्दर्भमा महासचिव पोखरेलले विपद्को तत्कालीन व्यवस्थापनसँगै भविष्यमा यस्ता विपद्बाट हुने क्षति न्यूनीकरणका लागि दीर्घकालीन रणनीति आवश्यक रहेकोमा पनि जोड दिएका छन्।

Originally published on abcnews.com.np.