काठमाडौं । नुवाकोटको विदुर नगरपालिका–१०, बेत्रावतीमा बाढीले पुरिएको घरबाट ११ दिनपछि एक महिलाको जीवित उद्धार गरिएको छ।

भदौ १० गते रसुवाको भोटेकोसी नदीमा आएको विनाशकारी बाढीले पुरिएको आनन्द श्रेष्ठको चारतले घरभित्रबाट उनकी ६० वर्षीया श्रीमती चण्डिका श्रेष्ठको शनिबार दिउँसो जीवित उद्धार गरिएको हो।

उद्धारमा खटिएको सशस्त्र प्रहरी र नेपाल प्रहरीको टोलीले घरभित्रबाट महिला कराएको आवाज सुनेपछि खोजी तथा उद्धार अभियान अघि बढाएको थियो। त्यसक्रममा उनलाई भग्नावशेषबाट जीवितै निकालिएको सशस्त्र प्रहरी बलले जनाएको छ।

उद्धारपछि चण्डिका श्रेष्ठलाई नेपाली सेनाको हेलिकोप्टरमार्फत काठमाडौं ल्याइएको छ। उनलाई थप उपचारका लागि छाउनीस्थित वीरेन्द्र अस्पतालमा भर्ना गरिएको नेपाली सेनाले जनाएको छ।

भोटेकोसी बाढी आएको ११औँ दिनमा भएको यो जीवित उद्धारले बाढी–पहिरोमा बेपत्ता तथा पुरिएका व्यक्तिको खोजीमा आशा अझै जीवित रहेको सन्देश दिएको छ।

Originally published on abcnews.com.np.