काठमाडौं । भोटेकोशी नदीमा आएको बाढीपछि अपर त्रिशूली–१ जलविद्युत् आयोजनाको सुरुङभित्र फसेका एक चिनियाँ नागरिकको ११ दिनपछि जीवितै उद्धार गरिएको छ।

नेपाली सेना र दक्षिण कोरियाको डिजास्टर विज्ञ टोलीसहितको प्राविधिक टोलीले शनिबार उनलाई सुरुङबाट जीवितै उद्धार गरेको हो।

भदौ १० गते भोटेकोशीमा आएको बाढीपछि ती चिनियाँ नागरिक सुरुङभित्र फसेका थिए। उद्धारमा सहभागी एक अधिकारीका अनुसार सुरुङभित्र अत्यधिक पानी जमेकाले डुंगाको प्रयोग गरी उद्धार टोली भित्र प्रवेश गरेको थियो।

सुरुङभित्र बनेको दोस्रो पोखरीमा ती चिनियाँ नागरिकलाई जीवित अवस्थामा फेला पारिएको थियो।

उद्धारमा सहभागी अधिकारीले सुरुङभित्र धेरै पानी जमेकाले डुंगाबाट टोली प्रवेश गरेको जानकारी दिए। उनका अनुसार दोस्रो पोखरीबाट ती नागरिकलाई उद्धार गरिएपछि टोली अहिले तेस्रो पोखरीतर्फ अघि बढिरहेको छ।

प्राविधिकहरूका अनुसार सुरुङभित्र स्काभेटरसहितको गेग्रान थुप्रिएपछि विभिन्न स्थानमा पानी जमेर पोखरी बनेका छन्। यही कारण सुरुङभित्र उद्धार टोलीलाई अघि बढ्न कठिन भइरहेको छ।

जीवितै उद्धार गरिएका चिनियाँ नागरिकलाई थप उपचार तथा स्वास्थ्य परीक्षणका लागि हेलिकोप्टरमार्फत काठमाडौं ल्याइँदैछ।

भोटेकोशी बाढीपछि जलविद्युत् आयोजनाका सुरुङमा फसेकाको खोजी तथा उद्धार जारी छ। यसअघि त्रिशूली–३ ए जलविद्युत् आयोजनाको सुरुङबाट शुक्रबार दुई नेपाली नागरिकको १०औँ दिनमा जीवितै उद्धार गरिएको थियो।

अपर त्रिशूली–१ बाट चिनियाँ नागरिकको उद्धारसँगै भोटेकोशी बाढीपछि सुरुङबाट जीवित उद्धार हुनेको संख्या थपिएको छ। लगातार ११ दिनसम्म जारी उद्धार अभियानमा भएको यो सफल उद्धारले सुरुङभित्र अझै फसेका हुनसक्ने व्यक्तिको खोजीमा आशा थपेको छ।

Originally published on abcnews.com.np.