चितवन । स्थानीय प्रशासनले नारायणगढ–मुग्लिन सडक सोमबार (भदौ २२) बिहानदेखि आंशिक बन्द गर्ने भएको छ । तुइन खोलामा पहिरो रोकथामको काम गर्नुपर्ने भएकाले सवारी आवागमन आंशिक रूपमा रोक्न लागिएको हो ।

चितवनका प्रमुख जिल्ला अधिकारी गणेश अर्यालयद्वारा आइतबार (भदौ २१) जारी सूचनामा भनिएको छ, “कृष्णभीरमा सडक मर्मत कार्य जारी रहेको समयको सदुपयोग गरी नारायणगढ–मुग्लिन सडकको तुइन खोला परियोजनाको माटो कटान कार्य गरिनेछ ।”

कृष्णभीरको सडक मर्मत कार्य सम्पन्न भई सवारी आवागमन सञ्चालन नहुन्जेलसम्म यो कार्य जारी रहने सूचनामा जनाइएको छ ।

सवारी आंशिक रूपमा बन्द गरेर तुइन खेलामा समय–समयमा खसिरहने पहिरोको माथिल्लो भागको झर्न सक्ने माटो पन्छाउनेलगायत काम गर्न लागिएको छ । खस्न सक्ने सम्भावित भागलाई झारेर पहिरो व्यवस्थापनको काम गर्न लागिएको हो ।

यो अवधिमा समय–समयमा सवारीसाधन सञ्चालनका निम्ति सडक खुला गरिनेछ । नारायणगढ–मुग्लिन सडक बिहान ८ देखि ८ः३०, १०ः३० देखि ११, दिउँसो १ देखि १ः३०, ३ः३ः० देखि अपराह्न ४ र साँझ ६ बजेपछिको समयमा खुला गरिनेछ । यसबाहेकको समय उक्त स्थानमा सवारी रोकेर कार्य हुने सूचनामा उल्लेख छ । रासस

स्रोतका थप तस्बिर तथा कागजात

Originally published on abcnews.com.np.