काठमाडौं । लागुऔषध कारोबारमा संलग्न रहेको आरोपमा प्रहरीले धनुषाबाट नेपाली र भारतीय नागरिक गरी दुईजनालाई पक्राउ गरेको छ ।

प्रहरीका अनुसार उनीहरूलाई सोमबार बिहान जनकपुरधामबाट करिब २०० ग्राम खैरो हेरोइनसहित पक्राउ गरिएको हो ।

भारतबाट ठूलो परिमाणमा लागुऔषध नेपाल भित्र्याउन लागिएको सूचनाका आधारमा काठमाडौंको कोटेश्वरस्थित लागुऔषध नियन्त्रण ब्युरोको टोली धनुषा पुगेको थियो । विशेष तयारीसहित धनुषा पुगेको टोलीले दुईजनालाई नियन्त्रणमा लिए पनि उनीहरूको साथबाट अपेक्षा गरिएअनुसार ठूलो परिमाणमा खैरो हेरोइन बरामद भने नभएको ब्युरो स्रोतले जनाएको छ ।

पक्राउ परेका दुवैजनाको पहिचान प्रहरीले सार्वजनिक गरिसकेको छैन । उनीहरू लागुऔषध कारोबारमा संलग्न रहेको प्रारम्भिक अनुसन्धानबाट खुलेको ब्युरो स्रोतको दाबी छ ।

घटनाबारे थप अनुसन्धान भइरहेको प्रहरीले जनाएको छ ।

Originally published on abcnews.com.np.