काठमाडौं, ९ वैशाख । नुवाकोटको दुप्चेश्वर गाउँपालिका वडा नम्बर १ का वडा अध्यक्ष सुनबहादुर तामाङ चेलिबेटी बेचबिखानको आरोपमा आइतबार जेल चलान भएका छन् ।

काठमाडौं जिल्ला अदालतले नेपाली कांग्रेसबाट निर्वाचित वडाध्यक्ष सुनबहादुर तामाङलाई जगन्नाथ देवल कारागारमा चलान गर्न आदेश दिएपछि कारागार पठाइएको केन्द्रीय अनुसन्धान ब्यूरो सीआईबीले जनाएको छ ।

तामाङले २०५३ सालमा दुई किशोरीलाई झापा हुँदै भारत बेच्न लगेको घटनामा अदालतले दोषी ठहर गरेपछि जेल चलान गरिएको हो ।

नुवाकोट जिल्ला अदालतले २०७४ चैत्र ७ गते तामाङलाई मानव बेचबिखन मुद्दामा ३७ वर्ष ६ महिना कैद र २ लाख ५० हजार रुपैयाँ जरिवानाको सजाय सुनाएको थियो ।

सोही मुद्दामा उनलाई पक्राउ गरिएको सिआईबीले जानकारी दिएका छ । फैसला कार्यान्वायनका लागि सिआईबीले उनलाई आइतबार काठमाडौँ जिल्ला अदालतमा पेश गरेको थियो । अदालतले नुवाकोट अदालतको आदेश सदर गर्दै कारागार चलान गर्न आदेश दिएको हो ।

काठमाडौं जिल्ला अदालतले उनलाई २ महिनाअघि नयाँ मुद्दामा ८ लाख रुपैयाँ धरौटीमा छाड्ने आदेश दिएको थियो । त्यसविरुद्ध सरकारी वकिल कार्यालयले उच्च अदालतमा पुनरावेदन गरेको छ ।

सर्वोच्चले यसअघि उनलाई गएको बिहीबार तारेखमा रिहा गर्न आदेश दिएको थियो ।
नुवाकोट जिल्ला अदालतले ६ वर्ष कैद सजाय तोकेकोमा सर्वोच्चले उल्ट्याउँदै छाड्न आदेश दिएको थियो । त्यस मुद्दाको अभियुक्त आफ्नो बुवा नभएको भन्दै सुनबहादुरका छोराले बन्दी प्रत्यक्षीकरण मुद्दा हालेपछि सर्वोच्चले छाडेको थियो ।

तर सीआईबीले तामाङलाई छुटे लगत्तै फेरि अर्को मुद्धामा पक्राउ गरेको थियो । अहिले सोही दोस्रो मुद्धामा नुवाकोट अदालतले गरेको ३७ वर्ष ६ महिना कैद र २ लाख ५० हजार रुपैयाँ जरिवानाको सजायका लागि तामाङलाई जेल चलान गरिएको हो ।

वडाध्यक्ष तामाङविरुद्ध मानव बेचबिखन सम्बन्धी अन्य २ मुद्दा पनि अदालतमा विचाराधिन छन् ।