धरान, ११ वैशाख । सुनसरीको धरानमा प्रहरीले एक राउण्ड फायरिङ गरेको छ ।

पूर्वाञ्चल इन्जिनियरिङ क्याम्पसमा अध्ययनरत दुई विद्यार्थीमाथि छुरा प्रहार गर्ने मुख्य आरोपीलाई पक्राउ गर्ने क्रममा प्रहरीले फायरिङ गरेको हो ।

धरान–१५ स्थित महादेव चोक भन्दा तलबाट प्रहरीले कुम्बे राईलाई प्रहरीले पक्राउ गरेको हो । पक्राउ गर्ने क्रममा प्रहरीमाथि नै राईले अन्धाधुन्दा ढुंगा प्रहार गरेपछि इलाका प्रहरी कार्यालय धरानबाट खटिएको प्रहरी टोलीले एक राउण्ड फायरिङ गरेको थियो ।

प्रहरीले राईलाई पक्राउ गर्न फायरीङ गर्नुपरेको इलाका प्रहरी कार्यालय धरानका डिएसपी रामेश्वर पौडेलले जानकारी दिनुभयो । तर प्रहरीले प्रहार गरेको गोलीले राईलाई भने लागेन र फायर खोलेपछि मात्र राईलाई पक्राउ गर्न सफल भएको प्रहरीले बताएको छ ।

धरान–१५ विशाल चोक नजिकै साथीकोबाट नोट लिएर आउने क्रममा विद्यार्थीमाथि आक्रमण भइ मोबाइल र पैसा समेत लुट्ने प्रयास भएको थियो । आक्रमणबाट बाग्लुङका सुजन खड्का र काभ्रेका प्रदीप सापकोटा घाइते भएको डीएसपी पौडेलले जानकारी दिनुभयो ।

छुरा प्रहारबाट दुवैको छातीमा चोट लागेको छ भने सुजन खड्काको भने हातमा समेत चोट लागेको छ । घाइते विद्यार्थीहरुको उपचार धरान स्थित विपि कोइराला स्वास्थ्य विज्ञान प्रतिष्ठान धरानमा भइरहेको छ । घाइते सापकोटाको अवस्था सामान्य रहेपनि खड्कालाई भने तत्काल आइसीयुमा भर्ना गरिएको थियो । खड्का पनि अहिले खतरामुक्त रहेको अस्पतालले जानकारी दिएको छ ।