पाल्पा, १३ वैशाख । नेकपा एमालेका सचिव एवं परराष्ट्रमन्त्री प्रदीप ज्ञवालीले गते अन्तराष्ट्रिय श्रमिक दिवशको दिन बैशाख १८ गते वा कार्ल माक्र्स जन्मजयन्ती बैशाख २२ गतेको दिन एकता घोषणा गर्ने तयारी भएको बताउनुभएको छ ।

अगुवा कार्यकर्तालाई आज सम्बोधन गर्दै सचिव एवं परराष्ट्रमन्त्री ज्ञवालीले एमाले र नेकपा माओवादी केन्द्र विच एकताको लागि अधिकाशं विषयमा सहमति जुटिसकेको र केही विषयलाई मात्र दुवै पार्टीका अध्यक्षले टुङ्गाउनु पर्ने भएकोले केही दिन ढिलाई भएको बताउनुभयो । मन्त्री ज्ञवालीले पार्टी एकताको विषयमा शंका उपशंका नगर्न कार्यकर्ताहरु लाई आग्रह गर्नुभयो ।

वैशाख २८ गते हुन लागेको भारतीय प्रधानमन्त्री नरेन्द्र मोदीको नेपाल भ्रमणका क्रममा प्रधानमन्त्री ओलीको भारत भ्रमणको समयमा दुवै देशबीच भएका सहमति व्यवहारिक रुपमा कार्यान्वयन गर्ने विषयमा छलफल हुने उहाँले जानकारी गराउनुभयो । यस्तै, कृषि साझेदारी र रेल सम्भाव्य अध्ययनको विषयमा सम्झौता हुने गरी तयारी भएको उहाँले बताउनुभयो ।

भारतीय प्रधानमन्त्री मोदी भ्रमणका समयमा संसद अधिवेशन नभएकोले संसदमा संम्वोधन गर्ने कुनै कार्यक्रम नभएको मन्त्री ज्ञवालीले जनाउनुभयो ।

अर्को प्रसंगमा तीन वर्षदेखि बन्द अवस्थामा रहेको तातोपानी नाका खुलाउने विषयमा चिनिया पक्षसँग उच्चस्तरीय कुराकानी भएको परराष्ट्रमन्त्री ज्ञवालीले बताउनुभयो ।