काठमाडौं, १८ वैशाख । उपराष्ट्रपति नन्दबहादुर पुन पासाङले श्रमजीवीको जीवनमा परिवर्तन नआएसम्म समृद्धि सम्भव नभएको बताउनुभएको छ ।

अन्तर्राष्ट्रिय मजदुर दिवसको अवसरमा शुभकामना सन्देश दिँदै उपराष्ट्रपति पुनले श्रमजीवी वर्गले अधिकार र आर्थिक सामाजिक जीवनमा सकारात्मक परिवर्तन नआएसम्म समृद्धि सम्भव नभएको स्पष्ट पार्नुभएको छ ।

उहाँले १२९ औं अन्तर्राष्ट्रिय मजदुर दिवसको अवसरमा देश तथा विदेशमा रहनुभएका सम्पूर्ण नेपाली दिदी–बहिनी तथा दाजुभाईहरुमा सुख, शान्ति, समृद्धि एवम् सम्पूर्ण मजदुरहरुको उत्तरोत्तर प्रगतिको शुभकामना व्यक्त गनुभएको छ ।

नेपाली श्रमजीवी वर्गले अनेकन समस्याहरु भोग्दै आएको र नयाँ संविधानले मजदुरहरुको हक हितका लागि गरेको संवैधानिक व्यवस्थाको कार्यान्वयन भएमा मात्रै पनि मजदुरहरुको धेरै अधिकार प्राप्त हुने विश्वास उपराष्ट्रपति पुनको छ ।