तेह्रथुम, २५ साउन । तेह्रथुमको मेन्छ्यायेम गाउँपालिका– ६, मोराहाङस्थित घुम्तीचोक र बतासे बस्तीका करिब १५ घर पहिरोको उच्च जोखिममा परेका छन् ।

सातायता यो क्षेत्रमा परेको भारी वर्षाका कारण यी गाउँका १५ घर पहिरोको जोखिममा परेका हुन् । नजिकको ताङमाया खोलाले निर्माणाधीन जिरीखिम्ती–मोराहाङ सडक खण्डमाथिबाट पहिरो तान्न थालेको छ ।

खहरेखोलामा समेत पानीको बहाव बढेको छ । बस्तीको आडको रुपमा रहेको जमिन लच्किएका कारण घुम्तीचोक र बतासेका बासिन्दाको दुई दिनदेखि निद्रा हराएको छ । चार परिवार भने घर छाडेर छिमेकीको घरमा बसिरहेका स्थानीयवासी नरेन्द्र खापुङले जानकारी दिनुभयो ।

‘पहिरोले घर बगाउने डर भएपछि घुम्तीचोकका चार परिवारले घर छाडेका छन्,’ उनले भने । मंगलबार यहाँका बासिन्दाले जिल्ला प्रशासन कार्यालय, नेपाल रेडक्रस सोसाइटी लगायत संघ संस्थालाई समेत पहिरोले गाउँ नै जोखिममा पारेको बारे जानकारी गराएका छन् ।

पहिराले गाउँनै जोखिममा पारेको भन्ने जानकारी आएको प्रमुख जिल्ला अधिकारी वेदनिधि खनालले बताउनुभयो । उहाँले सचेत भएर बस्न स्थानीयवासीलाई सूचना जारी गरेको बताउनुभयो । ‘ठूलो धन जनको क्षति नहोस् भनेर सतर्कता अपनाउन भनेको छु,’ प्रजिअ खनालले भन्नुभयो ।

पहिरोको जोखिम रहेको क्षेत्रको मेन्छ्यायेम गाउँपालिकाले समेत अनुगमन गरी सचेत रहन भनेको छ । “जुनसुकै बेला पनि पहिरोले गाउँलाई तान्नसक्ने देखिएपछि सचेत रहन भनेको मेन्छ्यायेम गाउँपालिका–६ का वडाध्यक्ष प्रदीप बुढाथोकीले भन्नुभयो,” । घुम्तीचोक भएर जिरीखिम्तीदेखि मोराहाङ, श्रीजुङ, पौठाकबाट सम्दु जोडिने सडक निर्माण भइरहेको छ ।