आज हरिसयनी एकादशी, अर्थात हरि शयन गर्न गएका दिन ।
मान्छेहरू हिलो मैलोमा डुबुल्की मार्दै मानो रोपेर मुरि फलाउने काममा लागिरहेका बेला,
मान्छेलाई दुःखमै छाडेर भगवान हरि शयन गर्न जान्छन् ।
तर हामी उनलाई पुजा गर्छौं ।
हरि हलो जोत्न मान्दैनन्, आलि लगाउन मान्दैनन् ।
उनलाई हिलोसंग घिन लाग्छ,
किनकी उनी कमलको फुलमा शयन गर्छन् ।
हरिलाई बियाडको बीउ उखाल्न आउंदैन,
उनलाई छुपुछुपु धान रोप्न पनि आउंदैन
उनलाई असारे भाका मन पर्दैन ।
किनकी उनको भजन सुन्ने बानी छ
मंसिरमा घरघर अन्नले भरिभराउ हुन्छ,
मीठो मसिनो खाने बेला हुन्छ,
अनि हरि ब्युंझन्छन् ।
हामी हरिबोधनी एकादसी भन्दै हरिलाई पुज्छौं ।
भकारि भरि अन्न भएपछि हाम्रो मन दङ्ग हुन्छ ।
अनि हामी हरिको भजन गाउँछौँ ।
हाम्रा नेता जस्तै हरि,
दुख पर्दा भाग्ने, सुखमा टुप्लुक्क सामेल हुने ।
हामीले नै भोट दिने, हाम्रै माथी कर थोपार्ने
हामीले नै नेता बनाउने हामीलाई नै शासन गर्ने
हामी त सेवकरूपी नेता खोज्दै थियौं
हामी त शासक होईन साथी खोजेका थियौं ।
तर भोट नसकिंदा सम्म सेवक, पाए पछि शासक
हरि जस्तै नेता ।
हामी पनि के कम ?
दुख पर्दा भाग्ने हरिलाई पुजा गर्छौं,
साथ नदिने नेतालाई भोट दिन्छौं ।