काठमाडौं, १५ साउन । दीपाश्री निरौलाको निर्देशन रहेको सिनेमा‘ छक्का पञ्जा ३’को पहिलो गीत ‘पहिलो नम्बरमा’हिजो सोमबार सार्वजनिक गरिएको छ ।

‘छक्का पञ्जा २’ मा गीत चोरेको आरोप बेहोरेको निर्माण टिमले यो गीतबाट सकारात्मक प्रतिकृया पाइरहेको छ जसले काममा थप हौसला र उर्जा प्रदान गरेको छ । सार्वजनिक भएको गीतले दर्शकको माया पाइरहेको देखेर निर्माण पक्ष निकै खुशी देखिएको छ ।

नेपाली युट्युब संस्करणको ट्रेण्डिङ १० मा आइपुगेको यो गीतलाई युट्यूबमा २४ घण्टामा ८ लाख ८ हजार पटक हेरिएको छ । सोमबार दिउँसो २ बजेर ३५ मिनेटमा सार्वजनिक गरिएको यो गीतलाई २४ घण्टामा यति भ्यूज मिलेको हो जुन समान्यतया धेरै मानिन्छ ।

तर यस गीतले छोटो समयमा धेरै पटक हेरिने गीतको रेकर्ड भने राख्न सकेको छैन । यस अघि सिनेमा‘शत्रु गते’को गीत‘रुपै मोहनी’ले राखेको रेकर्ड यसले तोड्ने धेरैको अनुमान थियो । तर त्यो अनुमान अनुमानमै सीमित भएको छ ।

‘शत्रु गते’को रुपै मोहनीले २४ घण्टामा ८ लाख ३२ हजार भन्दा धेरै पटक हेरिने गीतको रेकर्ड बनाएको छ ।

जुनअहिले सम्मको इतिहासमा धेरै हो । यसअघि सिनेमा ‘छक्का पञ्जा २’ मा समावेश ‘नाइलनको साडी’लाई पनि २४ घण्टामा ८ लाख १६ हजार पटक हेरिएको थियो ।

राजेन्द्र थापाका शब्द र दीपक शर्माको संगीत रहेको ‘पहिलो नम्बर’मा डेबिड शंकर र बिन्दु परियारको आवाज रहेको छ ।

गीतमा कविराज गहतराजको कोरियोग्राफी रहेको छ भने पुरुषोत्तम प्रधानले गीतको छायाकंन गरेका हुन् । गीतमा सिनेमाका प्रायः कलाकारलाई फिचर गरिएको छ ।

दसैंको अवसर पारेर प्रदर्शनमा आउने यस सिनेमामा दीपकराज गिरी, दीपिका प्रसाईँ, जितु नेपाल, केदार घिमिरे, बुद्धि तामाङ, निर शाह, किरण केसी, शिवहरि पौडेल, जयनन्द लामा, अनुराग क्वँर, शारदा गिरी, संजोग कोइराला, वसन्त भट्टलगायतका कलाकारको अभियन रहेको छ ।