काठमाडौं,८ भाद्र । गृहमन्त्री रामबहादुर थापा बादलले कञ्चनपुरको महेन्द्रनगरमा प्रदर्शनका क्रममा गोली लागि गम्भीर घाइते भएका अर्जुन भण्डारालाई आज भेट गरेका छन ।

त्रिवि शिक्षण अस्पतालको मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा उपचाररत भण्डारालाई आज बिहान गृहमन्त्री थापाले भेटेका हुन्। भेटका क्रममा उनले सम्पूर्ण उपचार खर्च सरकारले बेहोर्ने बताएको घाइतेका दाइले जानकारी दिएका छन ।

कञ्चनपुरकी १३ वर्षीया निर्मला पन्तको बलात्कारपछि हत्या भएको र दोषीलाई कारबाहीको माग गर्दै बिहीबार महेन्द्रनगरमा प्रदर्शन भएको थियो। सो क्रममा प्रहरीको गोली लागि भण्डारासहित सन्तोष कठरिया, तीर्थ पनेरु, सरोज खड्का, मनोज बूढा र तेजराज भट्ट घाइते भएका थिए।

महेन्द्रनगरमा आफूले सानो मोबाइल पसल सञ्चालन गर्दै आएको भन्दै उनले आर्थिक अवस्था कमजोर रहेको बताए । गम्भीर घाइते भण्डारालाई थप उपचारका लागि काठमाडौं ल्याइएको थियो।