सिन्धुली, ६ कात्तिक । दशैंको अवसरमा भएको गोलञ्जोर गाउँपालिका स्तरीय फुटबल प्रतियोगितामा रानीखोला फुटबल क्लब विजयी भएका छन् । दशैं टीकाको भोलिपल्टबाट तीन दिनसम्म भएको फुटबल प्रतियोगितामा मूलडाँडा फुटबल टीमलाई ३–२ ले पराजित गर्दै रानीखोला प्रथम भएको हो ।

भाविनी युवा क्लब, खोक्लिङले आयोजना गरेको फुटबल प्रतियोगितामा प्रथम टीम रानीखोलाले शील्ड, प्रमाणपत्र र नगद १२ हजार रुपैयाँ प्राप्त गरेका छन् । त्यस्तै दोस्रो हुने मुलडाँडा टीमले शील्ड, प्रमाणपत्र र नगद सात हजार रुपैयाँ हात पारे ।

त्यसैगरी, तेस्रो हुने आयोजक भाविनी युवा क्लबले शील्ड, प्रमाणपत्र र नगद पाँच हजार रुपैयाँ प्राप्त गरेका छन् ।

प्रतियोगितामा सर्वाधिक गोलकर्ता छवि किरण गुरुङलाई पुरस्कार दिइएको थियो । उनले ३ गोल गरेका थिए । सो प्रतियोगितामा गोलञ्जोर गाउँपालिका क्षेत्रभरका १० टीम सहभागी थिए ।