धनगढी, ७ कात्तिक । भारतको मुम्बई भ्रमणमा रहेको धनगढी क्रिकेट एकेडेमी (डिसिए) को १७ वर्षमुनिको टोली  आफ्नो पहिलो मैत्रीपूर्ण खेलमा पराजित भएको छ ।

मुम्बईको स्टार सिसी क्लबले डिसिएलाई नौ विकेटले पराजित गरेको डिसिएले जनाएको छ । स्थानीय आजाद मैदानमा टस हारेर पहिले ब्याटिङको निम्तो पाएको डिसिएले ४० ओभरको खेलमा ३६ ओभरमा अलआउट हुँदै १०५ रन बनाएको थियो । डिसिएका लागि रोहन विकले सर्वाधिक ३५ रन बनाए । कप्तान सुबोध ऐरले १६, सक्षम पार्कीले १५ र सन्दीप आउजीले आठ रनको योगदान गरे ।

त्यस्तै, किरन नाथले तीन र निशान पन्तले एक रन जोडे । डिसिएका चार जना खेलाडी शून्य रनमै पवेलियन फर्केका थिए । डिसिएलाई धेरै रन बनाउनबाट रोक्ने क्रममा स्टार सिसीका लेग स्पिनर लक्ष्यले सर्वाधिक पाँच विकेट लिए । त्यस्तै, शुभम् र अङ्कितले दुई÷दुई विकेट हात पारे । १०६ रनको विजयी लक्ष्य पछ्याउन मैदानमा उत्रेको स्टार सिसीले १० दशमलब तीन ओभरमा एक विकेट गुमाएर सजिलै लक्ष्य पूरा ग¥यो । उसको जीतमा प्रारम्भिक ब्याट्सम्यान तस्यमले अर्धशतक पूरा गर्दै अविजित ५८ रन बनाए । अर्का ओपनर रोहित काम्लीले ३० र तेस्रो नम्बरमा ब्याटिङ्ग गरेका मयुरेशले नटआउट आठ रनको योगदान दिए ।

बलिङ्ग गर्दै सोनु मण्डलले डिसिएलाई एक विकेटको सफलता दिलाए । दुई ओभर बलिङ गरेका उनले मात्र १३ रन खर्चेका थिए । तीन ओभर बलिङ गर्दै निशान पन्तले सर्वाधिक ३३ रन खर्चे पनि कुनै विकेट हात पार्न सकेनन् ।

त्यस्तै, ३० रन खर्चेका कुश मल्ल र १७ रन खर्चेका विनोद विष्ट पनि विकेटविहीन बने । तीन बल फालेका राजन लोहनीले १० रन खर्चे । प्रतिद्वन्द्वी राम्रो र बलियो रहेकाले डिसिएका खेलाडीले राम्रो सिक्ने अवसर पाएको डिसिएका प्रशिक्षक दीपेन्द्र चौधरीले बताउनुभयो । १० दिनसम्मका लागि मुम्बई टुरमा गएको डिसिए टोलीले त्यहाँको विभिन्न क्लबसँग अझै छ वटा एकदिवसीय खेल खेल्नेछ । नियमित प्रशिक्षण गरिरहेका खेलाडीलाई थप ‘एक्सपोजर’ दिनका लागि मुम्बई टुरमा ल्याएको धनगढी क्रिकेट एकेडेमीका अध्यक्ष सुवास शाहीले बताउनुभयो । “यसले हाम्रो खेलाडीहरुमा निखारपना आउनेछ”, शाहीले भन्नुभयो ।