सिन्धुली, १७ कात्तिक। सिन्धुली जिल्लाकै सर्वोत्कृष्ठ राशी पुरस्कार रहेको मोहन विक्रम थापा स्मृति फुटबल प्रतियोगिता फाइनल खेल आज (शनिवार) हुने भएको छ ।

सिन्धुलीको भिमानस्थित जनजागृति विद्यालय प्रांगणमा हुने फुटबल प्रतियोगिताको फाइनल खेलको शनिवार बिहान ११ बजेकाट सुरु हुनेछ । फाइनल खेलका लागि सम्पूर्ण तयारी पूरा भएको आयोजक भिमान युवा क्लबले जनाएको छ ।

कात्तिक ८ गतेबाट सुरु भएको सो फुटबल प्रतियोगिताको फाइनलमा बर्दिबास स्पोर्टस क्लब महोत्तरी र चन्द्रमा क्लब महोत्तरीबीच प्रतिस्पर्धा हुनेछ ।

प्रतियोगिताको प्रथम हुनेले डेढ लाख नगद पुरस्कारका साथै शिल्ड, मेडल र प्रमाणपत्र पाउने छन् । दोस्रो हुनेले ५० हजार नगद, शिल्ड, मेडल र प्रमाणपत्र पाउने छन् ।

प्रतियोगितामा उत्कृष्ट खेलाडी, अनुशासित टिम र म्यान अफ दी म्याचको अवार्डसमेत रहेको आयोजक क्लवले जनाएको छ । सो प्रतियोगिताको फाइनल खेलमा दर्शकको रुपमा सहभागी हुन काठमाडौं, जनकपुर र सिन्धुलीका विभिन्न स्थानबाट व्यापक सहभागिता रहने आयोजकको अनुमान छ । सो प्रतियोगिता सिन्धुली टष्टको साझेदारीमा सम्पन्न हुन लागेको हो ।

सो प्रतियोगिताका फाइनल खेलमा विशेष अतिथिका रुपमा मिस नेपाल हङकङ सुस्मा लिम्बू पनि सहभागी हुने आयाजकले जानकारी दिएको छ ।

कार्यक्रममा सिन्धुलीका ख्याती प्राप्त कलाकारहरुले सांगीतिक कार्यक्रम समेत प्रस्तुत गर्नेछन् । कार्यक्रममा विशेष व्यक्तित्वहरुको समेत सहभागिता रहने आयोजकले जनाएको छ ।