बुटवल, ५ पुस । स्वरोजगार र आत्मनिर्भरता हाम्रो आधार , शहर देखि गांउ सम्म ब्यापार बिस्तार भन्ने मुल नाराका साथ आजबाट बुटवलमा लुम्बिनी एक्स्पो २०१८ अन्तराष्ट्रिय ब्यापार मेला सुरु भएको छ ।

मेलाको आज एक समारोहका बिच प्रदेश नम्बर ५ का मुख्यमन्त्री शंकर पोखरेलले उदघाटन गर्नुभयो । उदघाटन समारोहलाई सम्बोधन गर्दै मुख्यमन्त्री पोखरेलले बुटवललाई नेपालकै आर्थिक राजधानी बनाउने ढंगले प्रदेश सरकारले तयारी गरिरहेको जानकारी दिनुभयो । प्राईमलोकेशन भएर पनि बुटवलमा ब्यवसायीक संरचना नभएको भन्दै उहांले बुटवलका घरहरु अव ब्यवसायीक कम्प्लेक्सकारुपमा बन्नु पर्ने बताउनुभयो ।

उहांले सपना देखेपछिमा मात्र सफलता हात लाग्ने उल्लेख गर्दै बुटवलमा पनि घरघरमा हजारांै केपी ओली जन्मनु पर्ने बताउनुभयो । प्रधानमन्त्री केपी ओलिको सपनाले छिटै सार्थकता पाउने दाबी गर्दै मुख्यमन्त्री पोखरेलले यसै आर्थिक वर्ष भित्र लुम्बिनीबाट रेल मार्गको काम सुरु हुने बताउनुभयो ।
कार्यक्रममा बोल्दै आयोजक रुपन्देही ब्यापार संघका अध्यक्ष पदम श्रेष्ठले मेला महोत्सवकै लागि अस्थायी संरचनाका कारण करोडौं खर्च भैरहेको भन्दै स्थायी संरचनाका लागि सबैले पहल गर्न माग गर्नुभयो ।
बुटवलमा स्थायी प्रदर्शनी स्थल नभएका कारण हरेक वर्ष मेलाका लागि लाखौ खर्च हुने गरेको छ । कार्यक्रममा नेपालका लागि श्रीलङ्काका राजदुत स्वप्न स्वरा, राष्ट्रिय सभामा नेकपाका सचेतक खिमलाल भट्टराई लगायतले मेलाको सफलताको शुभकामना ब्यक्त गर्नुभएको थियो । मेला पुस १८ गते सम्म चल्ने छ ।