काठमाडौं,१३ पुस । तमु सञ्चारकर्मी संघ, नेपालले सातजना पत्रकारहरुलाई पुरस्कृत गरेको छ । शुक्रबार तमु (गुरुङ) सञ्चारकर्मी संघ, नेपालले तमु (गुरुङ) ल्होछार २०७५ को अवसरमा आदिवासी पत्रकारहरुलाई पुरस्कृत गरेको हो ।

पूर्व प्रधान सेनापति छत्रमानसिंह गुरुङ तथा कमला गुरुङ पत्रकारिता पुरस्कारबाट राजबहादुर गुरुङ र गजुरधन राई पुरस्कृत भएका छन् । पुरस्कारको राशी जनही २० हजार रुपियाँ र सम्मानपत्र रहेको छ ।

सुश्री भद्रकुमारी घले पत्रकारिता पुरस्कारबाट जुली गुरुङ, तमू आदिकवि हर्कबहादुर गुरुङ स्मृति पत्रकारिता पुरस्कारबाट मिलन गुरुङ पुरस्कृत भएका छन् ।

पुरस्कारको राशी १० हजार रुपियाँ नगद र सम्मानपत्र रहेको छ । त्यस्तै, लक्ष्मी गुरुङ पत्रकारिता पुरस्कारबाट असिफ गुरुङ, सीआई टेकबहादुर गुरुङ तथा रसकुमारी गुरुङ पत्रकारिता पुरस्कारबाट आश गुरुङ र तमु पत्रकारिता पुरस्कारबाट आनन्द गुरुङ पुरस्कृत भएका छन् ।

संघका पूर्वअध्यक्ष डण्ड गुरुङको संयोजकत्वमा रहेको छनौट समितिको सिफारिसमा पुरस्कार प्रदान गरिएको हो । संघका अध्यक्ष रविन गुरुङका अनुसार हरेक वर्ष पुरस्कृत हुनेमा एकजना गैर गुरुङ पत्रकार छनौट गर्ने गरिएको छ ।