काठमाडौं, ११ चैत । पछिल्लो समय छिमेकी भारतसँग चर्किएको विवादका बीच शनिबार पाकिस्तानले राष्ट्रिय दिवसको अवसरमा सैन्य ताकत प्रदर्शन गर्दै ठूलो परेड आयोजना गरेको हो । त्यसै समारोहमा बोल्दै पाकिस्तानका राष्ट्रपति अरिफ अल्भिले भारतसँग शान्तिका लागि आह्वान गर्दै आफूहरुले केबल शिक्षा र स्वास्थ्यको क्षेत्रमा मात्र केन्द्रित रहनुपर्ने बताएका हुन् ।

शनिबारको सैन्य परेडमा पाकिस्तानद्वारा निर्मित जेएफ–१७ लडाकू विमानहरुको हवाइ प्रदर्शन गरिएको थियो । तिनै मध्येको एक विमानले गत महिना भारतीय लडाकू विमानमाथि प्रहार गरेको रोयटर्सले जनाएको छ ।

यस्तोमा अल्भिले आफूहरु युद्धमा विश्वास नराख्ने हुनाले वार्तामार्फत समस्या समाधान गर्न चाहेको बताएका हुन् । त्यसैगरी उनले गत महिना भारतीय सेनामाथि भएको आत्मघाती बम हमलामा भारतले पाकिस्तानलाई बिना प्रमाण दोषी ठहर गरेको समेत आरोप लगाएका हुन् । उनले भने, “आजको सैन्य परेडले सबैलाई यही सन्देश दिन्छ कि हामी शान्तिप्रेमी जनता हौँ तर हामी कहिल्यैपनि आफ्नो सुरक्षासँग सम्झौता गर्ने छैनौँ ।”
सो परेडमा मलेसियाका प्रधानमन्त्री महाथिर मोहोम्मद पनि उपस्थित थिए । यसअघि पाकिस्तानका प्रधानमन्त्री इमरान खानले उनलाई प्रमुख अतिथिका रुरपमा निम्ता गरेका थिए । त्यस्तै खानले भने यसअघि ट्वीटरमार्फत आफूले भारतीय प्रधानमन्त्री नरेन्द्र मोदीबाट राष्ट्रिय दिवसको शुभकामना प्राप्त गरेको जानकारी दिएका हुन् । उनका अनुसार मोदीले क्षेत्रीय सहकारिता र शान्तिको चाहाना व्यक्त गर्दै सो सन्देश दिएका छन् । उनले भने, “मेरो विचारमा हामीले वास्तवमै प्रभावकारी वार्तासँगै सबै समस्या समाधान गर्ने समय आइसकेको छ ।”