कोहलपुर, ४ फागुन ।
नेपाल कम्युनिष्ट पार्टी नेकपाका अध्यक्ष प्रचण्डले पार्टी र सरकार संचालनमा पार्टी केन्द्रिय कमिटीले गरेको निर्णय अक्षरस कार्यान्वयन हुने बताउनु भएको छ ।
पार्टी एकिकरण पछिको पहिलो पटक राखिएको प्रदेश ५ स्तरिय प्रशिक्षण कार्यक्रमलाई बांकेको कोहलपुरमा सम्बोधन गर्दै अध्यक्ष प्रचण्डले केन्द्रिय कमिटीले गरेका निर्णयलाई सरकार र पार्टी संचालनमा लागु गरिने बताउनु भयो । अध्यक्ष प्रचण्डले पार्टी एकीकरणको सृङ्खला २०५८ सालबाट सुरुभएको स्मरण गर्दै पार्टी एकता कुनैपनि हालतमा कमजोर नहुने दाबी गर्नुभयो । पार्टी एकता मुलुक परिवर्तनका लागि र समाजबाद ल्याउनका लागि गरिएको प्रचण्डको भनाई थियो ।
सरकार कमजोर हुंदा मुलुकले गति लिन नसकेको प्रसंगको चर्चा गर्दै अध्यक्ष प्रचण्डले अर्का अध्यक्ष केपि शर्मा ओलीको नेतृत्वमा ५ वर्ष सरकार संचालन गरेर स्थायीत्व दिईने बताउनु भयो । उहांले बहुचर्चित एम सि सिका बिषयमा पार्टीले अध्ययन कार्यदल गठन गरेको बताउंदै कार्यदलले दिएको प्रतिबेदनकै आधारमा एम सि सिका बिषयमा निर्णय गरिने जिकिर गर्नुभयो ।
कार्यक्रममा पार्टीका स्थायी समिती सदस्य तथा प्रदेश ५ का ईन्चार्ज एवं मुख्यमन्त्री शंकर पोखरेलले नेतृत्व कै कारण पार्टी एकता मजबुत बन्न नसकेको आरोप लगाउनु भएको प्रशिक्षणमा सहभागि कार्यकर्ताले जानकारी दिए । मुख्यमन्त्री पोखरेलले बिगतलाई सम्झेर होईन भबिश्यलाई सम्झेर एकतालाई मजबुत बनाउन आग्रह गर्नुभएको उनले बताए ।
कडा सुरक्षा बिच संचालन भएको प्रशिक्षणमा पत्रकारहरुलाई सहभागिताको दृष्य छांयाङ्कन गर्न दिईएपनि नेताहरुको संबोधनमा बाहिर जान भनिएको थियो । प्रशिक्षणमा पार्टी नेता तथा गृहमन्त्री रामबहादुर थापा बादल, महासचिव बिष्णु पौडेल लगायतले सम्बोधन गर्नुभएको थियो । प्रदेशका ३ हजार बढी कार्यकर्ताहरु प्रशिक्षणमा सहभागि भएकाछन् । पार्टीले पार्टीका सबै तहका नेता तथा कार्यकर्ताहरुलाई पार्टी कै समर्थकहरुको घर बस्ने ब्क्यवस्था मिलाईको नेकपाको बांके जिल्ला कमिटीले जनाएको छ ।