काठमाडौं, २७ फागुन । दोस्रोपटक मृगौलाको प्रत्यारोपण गराउनुभएका प्रधानमन्त्री केपी शर्मा ओलीको स्वास्थ्यमा सन्तोषजनक सुधार भइरहेको अस्पताले जनाएको छ ।

त्रिभुवन विश्वविद्यालय शिक्षण अस्पतालले आयोजना गरेको नियमित पत्रकार सम्मेलनमा प्रधानमन्त्री ओली र मिर्गौलादाता समीक्षाको स्वास्थ्य अवस्थामा थप सुधार हुंदै गएको जनाएको हो । मृगौला प्रत्यारोपण गरेको छैठौं दिन प्रधानमन्त्री ओलीलाई नियमित सन्तुलित आहार, हिंडडुल र व्यायामलाई निरन्तरा दिइएकोे अस्पतालका कार्यकारी निर्देशक प्राध्यापक डाक्टर प्रेमकृष्ण खड्गाले जानकारी दिनुभयो । खड्गाले प्रधानमन्त्री ओलीलाई मृगौला दिने समीक्षा संग्रौलाको स्वास्थ्य पनि राम्रो रहेको जानकारी दिनुभयो ।

पत्रकार सम्मेलनमा प्रधानमन्त्रीका प्रेस सल्लाहकार सूर्य थापाले प्रधानमन्त्रीको डिस्चार्जबारे पूर्वानुमान नगर्न आग्रह गर्नुभयो । प्रधानमन्त्रीको स्वास्थ्य अवस्थाबारे जानकारी दिने क्रममा संचारकर्मीले डिस्चार्जबारे सोधेको प्रश्नको जवाफ दिँदै सल्लाहकार थापाले अनावश्यक हल्ला भन्दा आधिकारिकतामा ध्यान दिन आग्रह गर्नुभएको हो । प्रधानमन्त्री केपी शर्मा ओलीको गत बुधबार त्रिवि शिक्षण अस्पताल महारजगञ्जमा दोस्रोपटक मिर्गौला प्रत्यारोपण गरिएको थियो । उहांलाई भान्जी समीक्षा संग्रौलाले मिर्गौला दिनुभएको थियो ।